Elena Rybakına álemdik eki reıtıngte kósh bastady

ASTANA. KAZINFORM — Qazaqstandyq tennısshi Elena Rybakına Tennis Abstract saraptamalyq platformasynyń maýsymdyq yElo jáne jalpy Elo reıtıngterinde birinshi orynǵa shyqty, dep habarlaıdy Sports.kz.

Elena Rybakına álemdik eki reıtıngte kósh bastady
Foto: QTF

Maýsymdyq yElo reıtınginde qazaqstandyq sportshy 2166,8 upaı jınap, reseılik Mırra Andreevany (2146,1) jáne amerıkalyq Korı Gaýffty (2144,0) basyp ozdy. Bul reıtıngte esepke alynǵan matchtarda Rybakınanyń enshisinde 54 jeńis pen 14 jeńilis bar.

Jalpy Elo reıtınginde de Qazaqstan ókili 2159,2 upaımen kósh bastap tur. Ekinshi orynda Belarýs tennısshisi Arına Sobolenko (2139,0), al úshinshi orynda Korı Gaýff (2128,2) ornalasqan.

Reıtıngter 16 qarashada jańartylǵan. yElo júıesi tennısshilerdiń aǵymdaǵy kúntizbelik jyldaǵy nátıjelerin esepke alyp, qarsylastarynyń deńgeıi men ótkizgen matchtarynyń sanyna qaraı upaıyn túzetedi. Al jalpy Elo reıtıngi sońǵy 52 aptadaǵy nátıjelerdi eskerip, qarsylastardyń deńgeıin de baǵalaıdy.

Aıta keteıik, Rybakına Áıelder tennısi qaýymdastyǵynyń (WTA) resmı reıtınginde de birinshi orynda. 16 qarashadaǵy málimet boıynsha qazaqstandyq tennısshiniń enshisinde 8099 upaı bar. Ol eń jaqyn qarsylasy Mırra Andreevany (7806 upaı) basyp ozǵan.

Buǵan deıin Elena Rybakına eıs sany jóninen ekinshi jyl qatarynan úzdik shyqqany týraly jazǵan bolatynbyz.