Elena Rybakına álemdegi eń kóp tabys tapqan on tennısshiniń qataryna kirdi
ASTANA. KAZINFORM – Qazaqstannyń birinshi, álemniń 6-raketkasy Elena Rybakına 2024 jyly álemdegi tabysty eń kóp tapqan on tennısshiniń qataryna kirdi.
Reseılik Forbes basylymy málim etkenindeı, 25 jastaǵy qazaqstandyq tennısshi bıyl qanjyǵasyn 3 mln 876,915 myń AQSh dollarymen maılaǵan.
«Jyldyń qorytyndysy boıynsha altynshy oryn – maýsym basynda Elena kózdegen maqsat emes edi. Biraq Rybakına qıyn kezeńdi basynan keshirdi. Túrli sebeptermen segiz ret jarystarǵa qatysýdan bas tartty, bapkeri Stefano Výkovpen qosh aıtysty. Jańa maýsymǵa daıyndyqty Goran Ivanıshevıchpen bastady. Barlyq qıyndyqqa qaramastan, qazaqstandyq tennısshi Shtýtgart, Ábý-Dabı jáne Brısbende jeńimpaz atandy. Jyldyń qorytyndy týrnırine qatysyp, Arına Sobolenkony utty.
E.Rybakına sporttyq jolynda 15,7 mln astam dollar kóleminde tabys tapty. Tennısshiniń jarnamalyq portfolıosynda Lexus avtomobıl brendi paıda boldy, ol Qazaqstandaǵy ambassador atandy. Alaıda Elenanyń kólik júrgizýge quqyǵy joq. Bul týraly ol Shtýtgart týrnırinde jeńgeni úshin Porsche kóligi syıǵa tartylǵan kezde aıtqan bolatyn», dep jazady basylym.
Elena Rybakına Bıllı Djın Kıng kýbogy aıasynda 16-17 qarashada elordada ótetin Qazaqstan – Koreıa matchyna qatysý úshin túnde Astanaǵa ushyp keldi.
Eske sala keteıik, budan buryn Devıs kýbogynda Qazaqstan jasóspirimder quramasynyń alǵash ret shırek fınalǵa shyqqanyn jazǵan bolatynbyz.
Sondaı-aq Qazaqstan áıelder quramasy arbadaǵy tennısshiler úshin sheberlik saǵatyn ótkizdi.
