Elena Rybakına Ábý-Dabı týrnırinde kambek jasap, shırek fınalǵa shyqty

ASTANA. KAZINFORM – Qazaqstannyń birinshi, álemniń 5-raketkasy Elena Rybakına Ábý-Dabı (BAÁ) WTA 500 týrnıriniń shırek fınalyna joldama aldy. 

Qazaqstandyq tennısshi ekinshi aınalymda dúnıejúzilik reıtıngide 68-orynda turǵan 23 jastaǵy amerıkalyq Ketı Volynetspen sheberlik baıqasty.

Qarsylastar osyǵan deıin 2022 jyly Rolan Garros týrnırinde kezdesip, onda Rybakına 6:4, 6:0 esebimen jeńiske jetken edi. Bul joly birinshi partııada qazaqstandyq tennısshiniń jıi qateleskenin paıdalanǵan Volynets 5:1 esebimen alǵa ketti. Aqyry ol esesin jibermedi – 6:2. 

Ekinshi setti Elena breıkpen támamdady – 6:4. 

Úshinshi, sheshýshi partııany Rybakına breıkpen bastady – 2:0. Esep 5:3 bolyp, matchqa dop bergenimen, ol múmkindigin paıdalana almady. Degenmen oıyndy taǵy bir breıkpen túıindedi – 6:4.

Eki saǵat 27 mınýtqa sozylǵan tartysty báseke barysynda Rybakına 7 eıspen birge 13 breık-poınttyń tórteýin qur jibermedi. Volynets 1 eıs, 4 breıkpen (11 breık-poınt) kózge tústi.

- Match óte qıynǵa tústi. Ásirese, birinshi set aýyr boldy. Degenmen sonyń bárine qaramaı, oıynnyń meniń paıdama sheshilgenine qýanyshtymyn, - dedi Rybakına. 

Elena jartylaı fınalǵa shyǵý úshin álemniń 33-raketkasy, «Úlken dýlyǵa» týrnıriniń úsh dúrkin fınalısi, týnıstik Ons Jaber nemese reıtıngide 837-satydaǵy japonııalyq, 17 jastaǵy Vakana Sonobeniń qaı jeńgenimen talasady. 

Ótken jyly osy jarysta fınalda reseılik Darıa Kasatkınany 6:1, 6:4 esebimen jeńgen E.Rybakına jeńimpaz atanǵan edi. Bıyl sol chempıondyq ataǵy men reıtıngilik upaıyn qorǵaýy tıis. 

Taǵy bir qazaqstandyq, álemniń 21-raketkasy ıÝlııa Pýtıntseva ekinshi aınalymda reıtıngide 37-oryndaǵy chehııalyq, 2023 jylǵy Ýımbldon chempıony Marketa Vondroýshovaǵa jol berdi – 2:6, 3:6. 

Eske sala keteıik, budan buryn Zarına Dııastyń Úndistanda týrnırdiń 4-raketkasyn jarys jolynan taıdyrǵanyn jazǵan edik. Sondaı-aq bes qazaqstandyq jas tennısshi Eýropa reıtıngisinde TOP-100-ge kirdi.