Elena esimdi orys qyzy ıslamdy qabyldap, Aısha atandy
ASTANA. 17 sáýir. QazAqparat - Elena atty orys qyzy Aısha atanady. Bul týraly QMDB resmı saıtynda jarııalanǵan.
Qaraǵandy oblystyq ortalyq meshitine Elena esimdi orys qyzy kelip óziniń Islam dinin qabyldaǵysy keletinin aıtty. Qazaqstan musylmandary dinı basqarmasynyń málimetinshe, Elenaǵa meshittiń naıb ımamy Jandos Nyǵyman Islam sóziniń maǵynasyn, ár sábıdiń dúnıe esigin ashqanda musylman bolyp týatynyn túsindirdi. Sonymen qatar musylman balasy barlyq paıǵambarlardy moıyndap, Alla Taǵaladan kelgen qasıetti kitaptardyń barshasyna ıman keltiretinin de tilge tıek etip ótti.
Islam degen tek bes ýaqyt namaz oqyp, jylyna bir aı oraza ustaýmen shektelmeıtinin, ár musylmannyń ár isi Jaratýshynyń razylyǵyna jetkizetin deńgeıde jasalýy úshin tynymsyz izdenis pen damý ústinde bolýy qajet ekenin eskertti. Ári óz jumysyn jaqsy atqarý, otbasyn quryp, bala tárbıeleý, kórshi-qolańmen, aǵaıyn-týyspen jaqsy qarym-qatynasta bolý - bulardyń barlyǵy Islam dinin ustanǵan ár adamnyń ómir boıy atqaratyn amaldary bolýy tıis ekenin túsindirdi.
