Elena Ábdihalyqova elordalyq kórermender qoshemetine bólendi
ASTANA. QazAqparat - Astana kúni qarsańynda Kongress-holl saraıynda aqyn, ánshi-kompozıtor Elena Ábdihalyqovanyń «Men - Syrdarııamyn» atty shyǵarmashylyq keshi bolyp ótti.
Qyzylorda oblysynyń óner kúnderi aıasynda ótken bul óner keshinde avtordyń óreli óleńderi oqylyp, órshil de syrshyl ánderi shyrqaldy. Elena Syr óńirinde týǵan, qazir Astanada turady.
«Syr elim meniń - jyr elim meniń!» dep óleń shyǵaryp, oǵan án jazyp, ózi shyrqaǵan Elena Ábdihalyqova zalǵa jınalǵan kórermenderdiń ystyq yqylasyna bólendi. Ánderin oryndaý barysynda óz pikirin aıtyp, halyqpen suhbattasyp, syrlasyp otyrǵandaı óner keshin áserli ótkizdi. Kontsertte Mańǵystaý óńirine, elimizdiń shyǵys aımaǵyna arnaǵan ánderi oryndaldy. Sondaı-aq Jezqazǵan, Ulytaý ólkesiniń tarıhı qundylyǵyn jyrlaǵan «Jez dalany ańsaý» áni shyrqaldy.
Elena Ábdihalyqovanyń oryndaýyndaǵy Tabyldy Dosymovtyń «Qazaq edim degenshe» án-poemasy tyńdarman qaýymnyń jan-júregin zor tebireniske bóledi. Óıtkeni bul týynǵa Keńes ókimeti dáýirinde ultymyzdyń bastan keshken qasiretteri arqaý bolǵan. Osydan tórt jyl buryn Tabyldy dúnıe salǵanda, Elena ózi shyǵarǵan «Dospen qoshtasý» ánin oryndap berdi.
Kesh ıesi óz ánderin «Dostar» óner tobynyń súıemeldeýimen aıtty. Osy keshte Muqaǵalı Maqataevtyń sózine jazylǵan «Esińe meni alǵaısyń», «Janymdy meniń kim uǵar» jáne Ulyqbek Esdáýlettiń óleńine jazylǵan «Kózderińe ǵashyqpyn» ánderi shyrqaldy. Sondaı-aq aqyndar Svetqalı Nurjan, Tanakóz Tolqynqyzynyń sózderine jazylǵan ánder kórermen nazaryna usynyldy.
Shyǵarmashylyq keshti júrgizýshi, daryndy ánshi Jubanysh Jeksenuly men Elena ekeýi qosyla shyrqaǵan ánderge kórermender qýana qol soǵyp, qoshemet kórsetti.
Óner ıesiniń keshinde Syr óńirinen kelgen «Aınalaıyn» jas ónerpazdar toby, Jarqynbek Turymbet, ánshiler Serik Aıaǵanov, Shyǵys Qazaqstan oblysynan kelgen Radıon Nemtsov, batys óńirinen shyqqan Dáýlet Seıtjan Elena Ábdihalyqovanyń birneshe ánderin shyrqap, kórermenderdiń rızashylyǵyna bólendi. Sahnaǵa birinshi ret shyqqan jas ónerpaz Sholpan Sharapatqyzy qobyzyn myń qubyltyp, Qorqyttyń kúıin oryndap berdi.
Elena kesh barysynda qazaqtyń asa daryndy aqyny Farıza Ońǵarsynqyzyn ardaqty ápkesi retinde eske alyp, arnaý óleńin oqyp berdi.
