Elektrsamokattarǵa jańa talap: 1 shildeden ne ózgeredi
ASTANA. KAZINFORM — 1 shildeden bastap elektrsamokattardy paıdalaný qaǵıdalarynda ne ózgeredi? Іshki ister mınıstrligi jalǵa beriletin elektrsamokattardy paıdalanýshylarǵa baǵyttap, jańa erejelerdi túsindirdi.
— Qurmetti azamattar! 1 shildeden bastap jalǵa beriletin elektrsamokattardy paıdalanýǵa qatysty jańa talaptar kúshine enedi. Endi árbir jalǵa beriletin elektrsamokatqa tirkeý nómiri berilip, osylaısha zań buzǵan elektrsamokattar kameralar arqyly anyqtalatyn bolady. Sonymen qatar árbir samokat qoldanatyn azamatqa saqtandyrý polısi mindetteledi. Al kıksherıng kompanııalar elektrsamokattardyń tehnıkalyq jaǵdaıyn qamtamasyz etýge, olardyń jyldamdyǵy men ornalasqan jerin baqylaýǵa, belgilengen jerde jyldamdyqty avtomatty túrde shekteýge, olardy retsiz qaldyrýdy boldyrmaýǵa, samokattardyń esebin júrgizýge, qajetti málimetterdi ishki ister organdaryna joldaýǵa mindetti. Eger samokatty paıdalanýshynyń júrgizýshi kýáligi bolmasa, ol júris jolymen júrmeýi tıis. Muny servıs qatań baqylaýy qajet. Eske salamyz, elektrsamokattar velosıped jolymen nemese velosıped jolaǵymen júrýi kerek. Olar bolmaǵan jaǵdaıda joldyń oń jaq shetimen, jol jıegimen, trotýarmen nemese jaıaý júrginshiler jolymen qozǵalýǵa bolady. Trotýarda júrgen kezde jyldamdyq saǵatyna 6 shaqyrymnan aspaýy tıis. Alaıda 25 tamyzdan bastap elektrsamokattardyń trotýarlar men jaıaý júrginshiler joldarymen júrýine tyıym salynady. Joldyń jıegimen júrýge tek 18 jasqa tolǵan, júrgizýshi kýáliginiń kez kelgen sanaty jáne arnaıy shlemi bar adamdarǵa ǵana ruqsat etiledi. Elektrsamokatpen jolaýshylardy, júkterdi tasymaldaýǵa jáne jaıaý júrginshiler ótkeli arqyly samokattan túspeı joldy kesip ótýge, sondaı-aq qarańǵy ýaqytta jaryq qaıtaratyn elementtersiz avtokólik jolymen júrýge tyıym salynady. Іshki ister mınıstrligi azamattardy zańnama talaptaryn saqtaýǵa shaqyrady. Joldaǵy qaýipsizdik ózimizden bastalady, — dedi ІІM ákimshilik polıtsııa komıtetiniń tóraǵasy Murat Qabdenov.
Aıta keteıik, buǵan deıin trotýarda elektrosamokatpen júrýge tyıym salynýy múmkin ekenin jazdyq.
