Elektrsamokat pen mopedti kez kelgen jerge qaldyrýǵa bolmaıdy — ІІM
ASTANA. KAZINFORM- Elektrsamokat nemese mopedti ruqsat etilmegen jerge qoıý jaıaý júrginshiler men jol qozǵalysynyń ózge qatysýshylaryna kedergi keltirýi múmkin. Qazaqstan Respýblıkasy Іshki ister mınıstrligi Kazinform agenttiginiń resmı saýalyna bergen jaýabynda mundaı kólik quraldaryn qaı jerlerge qoıýǵa bolmaıtynyn túsindirdi.
ІІM málimetinshe, elektrsamokattardy ornalastyrý kezinde qaýipsizdik talaptaryn saqtaý jáne jol qozǵalysynyń basqa qatysýshylaryna kedergi keltirmeý qajet.
Vedomstvo elektrsamokattardy myna jerlerde qaldyrýǵa bolmaıtynyn naqtylady:
— kólik júretin jol bóliginde, eger ol kólik qozǵalysyna kedergi keltirse;
— jaıaý júrginshiler ótkelderinde;
— velosıped jolaqtarynda;
— qoǵamdyq kólik aıaldamalarynda;
— ǵımarattardyń kireberisteri men shyǵaberisteriniń aldynda;
— pandýstarda;
— múmkindigi shekteýli azamattardyń júrip-turý joldarynda;
— jaıaý júrginshilerdiń qozǵalysyna kedergi keltiretin nemese olardyń qaýipsizdigine qater tóndiretin oryndarda.
ІІM elektrsamokattardy arnaıy jabdyqtalǵan turaq oryndaryna, jergilikti atqarýshy organdar nemese prokat operatorlary belgilegen oryndarǵa, sondaı-aq jaıaý júrginshilerdiń qozǵalysyna kedergi keltirmeıtin aýmaqtarǵa qoıýdy usynady.
Sonymen qatar 1 shildeden bastap Qazaqstanda jalǵa beriletin elektrsamokattarǵa qatysty jańa talaptar kúshine endi. Endi árbir prokattyq elektrsamokatqa tirkeý nómiri beriledi, al prokat operatorlary olardyń tehnıkalyq jaı-kúıin, qozǵalys jyldamdyǵyn jáne ornalasqan jerin baqylaýǵa, sondaı-aq retsiz turaqqa qoıylýyna jol bermeýge mindetti.
Al mopedter elektrsamokattar sııaqty emes, mehanıkalyq kólik quraldarynyń qataryna jatady. Sondyqtan olarǵa Jol júrisi qaǵıdalarynyń toqtaý jáne turaqqa qoıýǵa qatysty talaptary tolyq qoldanylady.
Mopedterdi: — arnaıy jabdyqtalǵan turaqtarǵa; –turaqqa qoıýǵa tyıym salynbaǵan jaǵdaıda joldyń oń jaq shetine; — jol belgileri men jol júrisi qaǵıdalary ruqsat etetin basqa oryndarǵa qoıýǵa bolady.
Sonymen qatar Jol júrisi qaǵıdalarynyń 122-tarmaǵynda kórsetilgen jerlerde mopedti qaldyrýǵa bolmaıdy.
Atap aıtqanda, ol basqa kólikterdiń nemese jaıaý júrginshilerdiń qozǵalysyna kedergi keltirmeýi, jol belgilerin jaýyp qalmaýy jáne joldyń kórinýin shektemeýi tıis. ІІM júrgizýshiler men eki dóńgelekti kólik paıdalanýshylaryn turaq ornyn tańdaǵanda aınaladaǵy adamdardyń qaýipsizdigin birinshi orynǵa qoıýǵa shaqyrdy.
Aıta keteıik, elordada 200-ge jýyq samokat paıdalanýshysy jaýapkershilikke tartyldy.
