Elektrovelosıpedti tirkeý: qandaı jaǵdaıda aıyppul salynady

ALMATY. KAZINFORM – Almaty polıtsııasy qýaty 250 vattan asatyn jáne saǵatyna 25 shaqyrymnan joǵary jyldamdyqpen júretin elektrovelosıpedterdiń mindetti túrde tirkelýi kerek ekenin eskertti. Mundaı úlgiler zań boıynsha moped sanatyna jatady.

Almaty Polıtsııa departamenti ákimshilik polıtsııa basqarmasynyń protsessıng ortalyǵynyń basshysy Aıdyn Merkimbaev Óńirlik kommýnıkatsııalar qyzmetinde ótken brıfıngide keıingi jyldary elektrovelosıpedshiler sany edáýir artqanyn aıtty. Alaıda bul qala turǵyndaryna yńǵaıly ári ekologııalyq turǵyda taza kólik bolǵanymen, ony paıdalanar kezde zań talaptary eskerile bermeıdi.

Tirkeý qalaı júrgiziledi?

Qazirgi úlgidegi kóptegen elektrovelosıped saǵatyna 40-45 shaqyrymǵa deıin jyldamdyq alyp, qýaty 400 vattan asatyn qozǵaltqyshpen jabdyqtalǵan. Bul qarapaıym velosıped emes, zań boıynsha moped retinde tirkelýi qajet.

Tirkeý rásimi mynalardy qamtıdy: • tehnıkalyq pasport alý; • memlekettik tirkeý nómirin berý; • saqtandyrý polısin rásimdeý; • júrgizýshiniń «A» sanatyndaǵy kýáliginiń bolýy.

Bul úshin ıesi arnaıy avtoHQO-ǵa júginýge tıis. Onda kólik quraly tekserilip, VIN-kod beriledi jáne nómirlik belgi rásimdeledi. Barlyq qyzmet qoldanystaǵy zańnama aıasynda kórsetiledi. Aıdyn Merkimbaevtyń aıtýynsha, protsedýra mopedti tirkeýmen birdeı.

Aıyppul men jaýapkershilik

Tirkelmegen elektrovelosıpedti aıdaǵandarǵa 10 AEK (39 320 teńge) kóleminde aıyppul salynady. Sondaı-aq kólik aıypturaqqa qoıylady.

Aıdyn Merkimbaevtyń sózinshe, tirkelmegen elektrovelosıpedter jol qozǵalysyna qatysýshylarǵa qaýip tóndiredi. Mundaı kólikterdi urlyq nemese apat kezinde baqylaý qıyn, al jol-kólik oqıǵasynyń barlyq saldary júrgizýshiniń óz moınynda.

Jol apaty statıstıkasy

Polıtsııanyń dereginshe, jyl basynan beri Almatyda mopedter 534 ret jol apatyna ushyraǵan.

10 myńnan astam júrgizýshi ákimshilik jaýapkershilikke tartylyp, 1 700 kólik aıypturaqqa qoıylypty. Elektrosamokat pen elektrovelosıpedtiń ıeleri 12 myńǵa jýyq quqyqbuzýshylyq jasaǵan.

Buǵan deıin Almaty polıtsııasy elektrovelosıpedterdi tirkeý qajet ekenin túsindirgen edi.