Elektrosamokatty qalaı qaýipsiz paıdalanýǵa bolady
ASTANA. KAZINFORM — Almaty qalasynyń polıtsııa departamenti qala turǵyndary men qonaqtaryn elektrosamokattardy paıdalaný kezinde jol qozǵalysy qaǵıdalaryn qatań saqtaýǵa jáne jol qaýipsizdigine qater tóndiretin áreketterge jol bermeýge shaqyrady, dep habarlaıdy Polisia.kz.
Almaty qalasy polıtsııa departamenti ákimshilik polıtsııa basqarmasynyń bastyǵy Ábdinur Tasybaevtyń aıtýynsha, sońǵy ýaqytta bir elektrosamokatqa eki nemese odan da kóp adamnyń qatar minýi, sondaı-aq onymen kólemdi júk tasymaldaý jaǵdaılary jıilep ketken.
— Elektrosamokattyń qurylymy bir ǵana adamdy tasymaldaýǵa arnalǵan. Oǵan qosymsha jolaýshy mingizý nemese kólemdi júk tıeý kólik quralynyń tepe-teńdigin buzyp, ony basqarýdy qıyndatady ári qulaý men jol-kólik oqıǵasyna ushyraý qaýpin birneshe ese arttyrady. Barsha paıdalanýshyny qaýipsizdik talaptaryna jaýapkershilikpen qarap, Jol qozǵalysy qaǵıdalaryn múltiksiz saqtaýǵa shaqyramyz. Bul — tek samokat júrgizýshisiniń emes, aınalasyndaǵy basqa da jol qozǵalysyna qatysýshylardyń ómiri men densaýlyǵyna tikeleı qatysty másele, — dedi Ábdinur Tasybaev.
Polıtsııa jol qozǵalysy qaǵıdalaryn buzý Qazaqstan Respýblıkasynyń qoldanystaǵy zańnamasyna sáıkes jaýapkershilikke ákep soǵatynyn eske salady.
— Polıtsııa jeke utqyrlyq quraldaryn paıdalanýshylardy joldaǵy tártipti saqtaýǵa, ózge jol qozǵalysyna qatysýshylarǵa qurmetpen qaraýǵa jáne «bir samokat — bir adam» qaǵıdatyn ustanýǵa shaqyrady. Joldaǵy qaýipsizdik — árkimniń jaýapkershiliginen bastalady, — delingen aqparatta.
Aıta keteıik, almatylyqtar elektrsamokat erejesin buzǵandar týraly WhatsApp arqyly habarlaı alady.
