Elektrosamokat júrgizýshisi jaıaý júrginshimen soqtyǵysyp, esinen tanyp qaldy
NUR-SULTAN. QazAqparat – Elordada jaıaý júrginshimen soqtyǵysyp, jerge basymen qulaǵan elektrosamokat júrgizýshisi es-tússiz jatyr, dep habarlaıdy QazAqparat tilshisi.
«2019 jyldyń 23 tamyzynda Táshenov kóshesi boıynda, aıaldamaǵa taqaý jerde elektrosamokat júrgizýshisi jaıaý júrginshimen soqtyǵysyp qaldy. Ýaqyty – tańerteńgi saǵat 9. Oqıǵa kýágerlerin nemese tıisti aqparat bar azamattardan +7 702 313 03 15 nómirine habarlasýlaryn ótinemiz. Kólik júrgizýshilerdiń biriniń vıdeo tirkeýishine jazylyp qalýy da múmkin. Zardap shekken elektrosamokat ıesi es-tússiz jatyr. Kez kelgen aqparat mańyzdy», - dep jazdy áleýmettik jelilerdiń birine zardap shekken azamattyń dosy ári áriptesi Ulan Aqsultanov.
QazAqparat tilshisimen telefon arqyly tildesken Ulan oqıǵany egjeı-tegjeıli aıtyp berdi.
«Asqar avtobýs jolaǵymen júrip kele jatqanda aldynan bir adam júgirip shyqqan. Ol ruqsat etilmegen jerden joldy kesip ótpek bolǵanda samokatpen kele jatqan Asqarmen soqtyǵysqan. Vıdeo bar. Biraq qylmystyq is qozǵalǵannan keıin tergeý bul málimetterdi jarııa etpeýdi ótindi», - dedi Ulan Aqsultanov.
Onyń atap ótýinshe, zardap shekken azamat «Astana» telearnasynda dızaıner bolyp jumys isteıdi. Elektrosamokat teýip júrgenine de biraz ýaqyt bolǵan.
