«Elektrondyq úkimettiń» bazalyq ınfraqurylymy daıyn - A. Jumaǵalıev
ASTANA. Sáýirdiń 21-i. QazAqparat /Qanat Mámetqazyuly/ - Búgingi kúni «elektrondyq úkimettiń» bazalyq ınfraqurylymy daıyn.
Bul týraly QR Parlamenti Májilisiniń jalpy otyrysynda «QR keıbir zańnamalyq aktilerine QR «elektrondyq úkimetin» damytý máseleleri boıynsha ózgerister men tolyqtyrýlar engizý týraly» zań jobasy boıynsha baıandama jasaǵan Baılanys jáne aqparat mınıstri Asqar Jumaǵalıev málim etti, dep habarlaıdy QazAqparat.
«Elektrondyq úkimettiń bazalyq ınfraqurylymy birqatar júıeden turady. Atap aıtqanda, buǵan memlekettik derekter bazasy, tólem shlıýzi, elektrondyq qujat aınalymy sekildi júıeler kiredi. Al jańa zań jobasynda «elektrondyq úkimetti» damytýdyń birqatar baǵyttary aıqyndalyp otyr. Bulardyń arasynda elektrondyq memlekettik qyzmetterdi tóleý múmkindigin qarastyrý, aqparattyq memlekettik resýrstarda memlekettik tildiń qoldanylýy, aqparattyq qaýipsizdikti qamtamasyz etý sekildi máseleler kózdelgen», dedi mınıstr.
Onyń aıtýynsha, zań jobasy arqyly «elektrondyq úkimet» salasyndaǵy memlekettik tildi qoldaný máselesine de nazar aýdarylǵan. Bul rette eń aldymen memlekettik tilde elektrondyq memlekettik qyzmetterdi usyný sharalary qarastyrylady. Budan bólek ınterfeıste jáne memlekettik derekter bazasynda memlekettik tildegi aqparatty qoldaý sharalary da qamtylǵan.
«Aqparattyq qaýipsizdik máselesinde de birqatar normalar qarastyrylyp otyr. Atap aıtqanda, zań jobasynda elektrondyq tsıfrlyq qoltańbany shyǵarý qyzmetin baqylaý, memlekettik organdar arasynda qorǵalǵan baılanys arnalaryn uıymdastyrý máseleleri kózdeledi», dedi mınıstr.
