«Elektrondyq úkimetti» damytý arnaıy zańmen retteledi
ashanyń 3-i. QazAqparat /Qanat Mámetqazyuly/ - Elimizdegi «elektrondyq úkimetti» damytý arnaıy zań arqyly júzege asady. Búgin QR Parlamenti Májilisi Halyqaralyq ister, qorǵanys jáne qaýipsizdik komıtetiniń keńeıtilgen otyrysynda osy maqsattaǵy «QR keıbir zańnamalyq aktilerine Qazaqstan Respýblıkasynyń «elektrondyq úkimetin» damytý máseleleri boıynsha ózgerister men tolyqtyrýlar engizý týraly» zań jobasy talqylandy,
dep habarlaıdy QazAqparat.
«Elektrondyq úkimetti» dáıektilikpen qalyptastyrý maqsatynda Úkimettiń qaýlysymen «Qazaqstan Respýblıkasynda «elektrondyq úkimetti» damytýdyń 2008-2010 jyldarǵa arnalǵan baǵdarlamasy qabyldanǵany belgili. Atalǵan baǵdarlamaǵa sáıkes «elektrondyq úkimetti» damytýdy normatıvtik quqyqtyq qamtamasyz etýdi jetildirý ony odan ári qalyptastyrýdyń birinshi kezektegi baǵyttarynyń biri retinde kórsetilgen.
«Zań jobasynyń maqsaty halyq pen bızneske «elektrondyq úkimettiń» qyzmetterin usynýdy retteıtin quqyqtyq normalar bekitý jolymen osy salany odan ári damytý bolyp tabylady. Bul baǵyttaǵy qujattyń basty qaǵıdattary memlekettik basqarý rásimderiniń sapasyn jáne tıimdiligin arttyrý, halyq pen bızneske arnalǵan memlekettik qyzmetterdi ońtaılandyrý bolyp otyr. Budan basqa, zań jobasymen memlekettik qyzmetterdiń móldirligin qamtamasyz etý, memlekettik organdardyń aqparattardy óńdeýdegi qaıtalanýdy boldyrmaý sharalary qarastyrylady. Usynylǵan normalardyń zańnamalyq bekitilýi álemdik tájirıbede qoldanylyp keledi. Mysaly, «Elektrondyq qyzmet týraly» zańdy Fınlıandııa - 2001 jyly, AQSh- 2002 jyly, Ońtústik Koreıa - 2003 jyly alǵashqylardyń biri bolyp qabyldaǵan bolatyn. Zań jobasynyń negizgi erejesi memlekettik qyzmet usyný tetigin zań júzinde bekitý bolyp tabylady», dedi Aqparattandyrý jáne baılanys agenttigi tóraǵasynyń orynbasary Erlan Dúrmaǵambetov.
Onyń aıtýynsha, qujat qazaqstandyq «elektrondyq úkimet» júıesin damytýǵa yqpal etetin bolady. Atap aıtqanda, ákimshilik rásimderdi ońtaılandyrý, elektrondyq memlekettik qyzmetter kórsetý máselelerinde memlekettik basqarýdyń sapasy men tıimdiligin arttyrý qarastyrylady. Sonymen birge, osy salanyń ashyqtyǵyn qamtamasyz etý, ótinishterdi qaraý merzimin qysqartý, tutynýshylardyń jáne qyzmetshilerdiń júktemesin azaıtý da boljanady. Aqparattandyrýdyń damýyna baılanysty jańa sala úshin uǵymdyq apparatty jetildirilý de kózdelýde.
Zań jobasy palatanyń jalpy otyrysyna shyǵarylatyn boldy.
