«Elektrondyq úkimetke» BUU-nyń búkilálemdik zertteýinde Qazaqstan 46-shy oryn aldy
ALMATY. Mamyrdyń 26-sy. QazAqparat /Erlik Erjanuly/ - «Elektrondyq úkimetke» BUU-nyń búkilálemdik zertteýinde Qazaqstan 182 eldiń ishinde 2008-2010 jyldary 81-shi orynnan 46-shy orynǵa kóterildi. Bul búgin Almatyda ótip jatqan «Software Enginering Summit-2010» birinshi Halyqaralyq ortalyqazııalyq konferentsııasynda aıtyldy,
dep habarlaıdy QazAqparat.
Ortalyqazııalyq halyqaralyq telekommýnıkatsııa men aqparattyq tehnologııalar kórmesi aıasynda ótken bul konferentsııanyń alǵashqy májilisi «Kóshbasshylyq, uıymdastyrý mádenıeti, jobalardy basqarý jáne ǵalamdyq ózgeris dáýirinde aqparattyq kommýnıkatsııalyq tehnologııa salasyndaǵy táýekelder» degen taqyrypta ótti. Onda «Ulttyq aqparattyq tehnologııalar» AQ-nyń Almaty fılıalynyń dırektory Farıda Aqsholaqova Qazaqstandaǵy «elektrondyq úkimetti» damytýdyń qorytyndylaryn baıandaǵan kezde eldiń álemdik reıtıngterdegi ustanymdarymen tanystyrdy.
«Elektrondyq úkimetke» BUU-nyń búkilálemdik zertteýinde Qazaqstan 2008-2010 jyldary elektrondyq qyzmet ındeksi boıynsha 95-ten 24-ke, telekommýnıkatsııalyq ınfraqurylymdar ındeksinde 106-dan 91-ge, elektrondyq qatysý ındeksinde 71-den 18-shi orynǵa kóterilip, adam kapıtaly ındeksinde 16-dan 22-shi satyǵa tómendedi. Halyqaralyq elektrobaılanys odaǵynyń reıtınginde 154 eldiń ishinen 2008 jylǵy 69-shy oryndy saqtap qaldy», deıdi Farıda Amantaıqyzy. Onyń aıtýynsha, «Ekonomıst» jýrnalynyń reıtınginde 70 eldiń arasynda 2008 jylǵy - 66 orynnan byltyr 3 satyǵa tómendep, ustanymyn birshama álsiretip aldy. Sondaı-aq Búkilálemdik ekonomıkalyq forýmnyń «Aqparattyq tehnologııa jónindegi ǵalamdyq esebinde» 134 eldiń ishinde de aldyńǵy jylǵy 71-shi satydan byltyr 2 satyǵa tómendep 73-shi orynǵa taban tiredi. Al olardyń bıylǵy jylǵy esepteri áli jarııalanbaǵandyqtan, elimizdiń qazirgi tańdaǵy reıtıngi ázirge belgisiz bolyp otyr.
