«Elektrondyq úkimet jáne elektrondyq qyzmetter» taqyrybyndaǵy semınarlarda 33 myńnan astam tyńdaýshy bilim aldy

ASTANA. 17 qazan. QazAqparat - Semınar aıasynda tyńdaýshylarǵa «egov.kz» portalynyń bólimderi men portalda usynylǵan qyzmetter týraly tolyq aqparat berilip, qandaı da bir anyqtamany nemese qyzmetti onlaın rejiminde alýdyń tártibi túsindiriledi.

QR Kólik jáne kommýnıkatsııa mınıstrliginiń málimetinshe, úıretýshiler portalda tirkelýdiń úderisi men elektrondyq tsıfrlyq qoltańbany (ETsQ) alý joldaryn úıretedi. Budan ózge portaldy qoldanýshylar salyq túrleri, memlekettik alym jáne jol qozǵalysy erejesin buzǵany úshin aıyppul tóleýdiń joldarymen jáne memlekettik organdarǵa elektrondyq ótinim joldaýdyń tártibimen tanysady.

Esterińizge salyp óteıik, osy jyldyń maýsym aıynda Qazaqstannyń barlyq oblys jáne aýdan ortalyqtarynda jyl saıynǵy oqytý semınarlary óz jumysyn bastady. Turǵyndarǵa elektrondyq qyzmetterdi alýdy úıretýge baǵyttalǵan semınarlardyń baǵdarlamasy kompıýterdi paıdalanýdy endi úırenip júrgen nemese orta deńgeıde paıdalana alatyn qoldanýshylarǵa eseptelgen. Jáne 1 akademııalyq saǵat dáris oqylsa, 2 akademııalyq saǵat boıyna tájirıbelik sabaq ótedi. Osydan soń, tyńdaýshylarǵa semınarǵa qatysqany týraly kýálik beriledi.

Trenıngter «Ulttyq aqparattyq tehnologııalar» AQ, QR Kólik jáne kommýnıkatsııa mınıstrligi, «Zerde» UAKH» AQ jáne jergilikti atqarý organdarynyń qoldaýymen ótkizýde.

Qarasha aıynyń sońyna deıin uıymdastyrýshylar respýblıkanyń 80 eldi mekeninde 67 myńǵa jýyq tyńdaýshyny oqytýdy josparlaýda. Baǵdarlama aıasynda kompanııalardyń ujymdary úshin arnaıy korporatıvtik oqytýlar da qarastyrylǵan. Azamattar men ujymdardan ótinishter Call-ortalyǵynda 1414 nómiri (statsıonarlyq jáne mobıldik telefondardan qońyraý soǵý tegin) boıynsha qabyldanady.