«Elektrondyq úkimet» portalynda «Balanyń týylǵanyn tirkeýge elektrondyq ótinish berý» jańa qyzmeti iske qosyldy

Bul týraly QRBaılanys jáne aqparat mınıstrliginiń baspasóz qyzmetinen málim etti.

Mınıstrlik taratqan málimetterge qaraǵanda, www.egov.kz «elektrondyq úkimet» portalynda «Balanyń týylǵanyn tirkeýge elektrondyq ótinish berý» jańa qyzmeti iske qosyldy. Jańa qyzmet túri nárestege jeke sáıkestendirý nómirin jáne týý týraly kýálikti onlaın rejıminde alýǵa múmkindik beredi. Eger ata-ana balanyń týylǵanyn ádettegideı azamattyq hal-aktilerin jazý bólimderi arqyly tirkeıtin bolsa, onda olarǵa úsh túrli qujat tapsyrý kerek bolady: ótinish, dárigerlik anyqtama jáne neke kýáliginiń kóshirmesi. Al «elektrondyq úkimet» portaly arqyly bar bolǵany ata-anasynyń jeke sáıkestendirý nómirin engizip, onlaın-ótinishti elektrondyq tsıfrlyq qoltańba arqyly kýálandyrsa jetkilikti.

Balanyń týylǵanyn tirkeýge ótinishdi bala týylǵan kúnnen bastap eki aıdan keshiktirmeı berý kerek jáne ata-analarynyń nekesi 2008 jyldyń 1 maýsymynan keıin tirkelgen bolýy tıis. Sebebi, memlekettik derekter qorynda 2008 jyldyń 1 maýsymynan bastap tirkelgen nekeler týraly aqparat jınaqtalǵan. Qyzmetti alýdyń nátıjesi retinde ótinish berýshiniń jeke kabınetine («Qyzmetterdi alý tarıhy» bólimine) PDF-formatynda anyqtama jiberiledi. Onda balaǵa jeke sáıkestendirý nómiri berilgeni jáne týý týraly kýálikti alý úshin azamattyq hal-aktilerin jazý bólimine kelý ýaqyty kórsetilgen aqparat beriledi. Al, ótinish oryndalmaǵan jaǵdaıda, ótinish berýshige memlekettik organnan naqty sebepteri kórsetilgen jaýap keledi.

Budan ózge, azamattyq hal-aktilerin jazý organdarynyń qyzmetin avtomattandyrý aıasynda qazaqstandyqtar nekeni buzý týraly ótinishti de portal arqyly bere alady (eger azamattardyń 18 jasqa tolmaǵan ortaq balalary bolmasa).