Elektrondyq úkimet negizderi mektepte oqytylatyn boldy
Memlekettik korporatsııanyń bul usynysyn QR Bilim jáne ǵylym mınıstrligi qoldap, tıisti buıryqqa Erlan Saǵadıev qol qoıdy. Osylaısha, 11-synyp oqýshylarynyń oqý baǵdarlamasyna tıisti ózgerister engiziledi.
«Tsıfrlyq Qazaqstan» baǵdarlamasyna sáıkes, orta, tehnıkalyq jáne joǵary kásibı bilim berý uıymdarynda tsıfrlyq saýattylyqty arttyrý qajet. Balalar mektep jasynan-aq tsıfrlyq tehnologııalardyń tilin túsinip, túrli elektrondyq júıeni qoldanýdy úırenýi tıis. Osy oraıda, 11-synyp oqýshylary aqparattyq tehnologııalar men ondaǵy qaýipsizdik sabaqtary aıasynda elektrondy úkimet portalynyń jumys isteý algorıtmin bilip, elektrondyq qujattar, tsıfrlyq qoltańba sııaqty termındermen tanysyp, memlekettik qyzmetterdi elektrondyq formatta alý úrdisin úırene alady.
«Orta eseppen jyl saıyn mektepti 140 myń oqýshy támamdaıdy desek, memlekettik qyzmetterdi HQO-ǵa barmaı-aq alýdy biletin «tsıfrlyq» urpaq jyl sanap kóbeıip otyrady. Onyń ústine, ol balalar ata-anasyna, ata-ájesine elektrondyq úkimet portalyn qoldanýǵa kómektese alady. Bul halyq arasynda tsıfrlyq saýattylyq kórsetkishiniń artýyna, sózsiz, áser etedi», - deıdi «Azamattarǵa arnalǵan úkimet» memlekettik korporatsııasynyń basqarma tóraǵasy Ablaıhan Ospanov.
Aıta keteıik, búginde elimizdiń 16 óńirinde ashylǵan Tsıfrlyq HQO arqyly tegin «Tsıfrlyq saýat ashý» kýrstaryna qatysyp, elektrondyq úkimet portalymen jumys isteý daǵdylaryn úırenýge bolady. Osy kúnge deıin 5 myńnan astam adam atalmysh kýrstardan ótip, tıisti sertıfıkattar alǵan. Oǵan qosa, 2018 jyly memlekettik korporatsııanyń uıymdastyrýymen «Elektrondyq úkimet jáne elektrondyq memlekettik qyzmetter» kýrsynan jergilikti atqarýshy organdardyń 3500 ókili ótti. Olar, óz kezeginde, jattyqtyrýshy mártebesin alyp, alǵan bilimderin 686 myń azamatqa úıretti.
