Elektrondyq saýdany júzege asyrý tártibi zań júzinde retteledi

Bul týraly Májiliste «Qazaqstan Respýblıkasynyń keıbir zańnamalyq aktilerine saýda qyzmetin retteý máseleleri boıynsha ózgerister men tolyqtyrýlar engizý týraly» zań jobasynyń tanystyrylymy barysynda málim boldy.

Ekonomıka jáne bıýdjettik josparlaý vıtse-mınıstri Tımýr Jaqsylyqovtyń aıtýynsha, qoldanystaǵy normatıvtik quqyqtyq baza elimizdegi saýda salasyn retteýdi tolyq kólemde qamtymaı otyr. Sonymen birge, Elbasy júktegen ekonomıkalyq mindetterge qol jetkizý maqsatynda memleket ishki jáne syrtqy naryqtardaǵy básekelestikke daıyn bolýy tıis. Al oǵan qol jetkizý quraly saýda saıasaty, onyń ishinde saýda qyzmetin tıimdi retteý bolyp tabylady, óıtkeni álemniń kez kelgen eliniń ekonomıkalyq tabysy men joǵary damý deńgeıi kóbine uıymdastyrylǵan saýda naryǵyna táýeldi bolady. Zań jobasy osyǵan oraı ázirlenip otyr», - deıdi vıtse-mınıstr. Onyń sózine qaraǵanda, qoldanystaǵy keıbir zań normalary Keden odaǵy sheńberinde jasalǵan halyqaralyq kelisimderge, sondaı-aq Dúnıejúzilik saýda uıymynyń kelisimderine sáıkes kelmeıdi. Budan basqa, osy júıeniń ózindik erekshelikterin eskere otyryp, elektrondyq saýdamen baılanysty quqyqtyq retteý máselelerin zańnamalyq túrde bekitý qajettiligi týyndaıdy.

«Osyǵan oraı, saýda qyzmetin júıelendirý maqsatynda azyq-túlik taýarlarynyń tabıǵı shyǵynynyń normalaryn ázirleý, elektrondyq saýdany júzege asyrý tártibin reglamentteý boıynsha tolyqtyrýlar engizý kózdeledi. Budan basqa, zań jobasynda «Ákimshilik quqyq buzýshylyq týraly» Qazaqstan Respýblıkasynyń Kodeksine «Taýar bırjalary týraly» zańynyń normalaryn oryndamaǵany úshin jaýapkershilik belgileý kózdelgen. Jalpy zań jobasyn qabyldaý saýda qyzmetin júzege asyrýdyń negizgi qaǵıdattaryn belgileý arqyly saýda qyzmetin júıelendirýge, elektrondyq saýda salasyndaǵy jumysty jetildirýge, sondaı-aq ulttyq zańnamany halyqaralyq saýda normalaryna beıimdeýge múmkindik beredi», - dedi T. Jaqsylyqov.