Elektrondyq oqytý muǵalimderdi qaǵazbastylyqtan aryltady - R.Eńsebaev
ASTANA. QazAqparat - Elektrondyq oqytý júıesi muǵalimderdi eseptilikten, qaǵazbastylyqtan aryltady. Búgin Májilistiń Áleýmettik-mádenı damý komıtetiniń keńeıtilgen otyrysynda «Ulttyq aqparattyq tehnologııalar» AQ basqarma tóraǵasy Rýslan Eńsebaev osylaı málim etti.
«Elbasy muǵalimderdiń esep-qısapty toltyrýmen emes, tek bala oqytýmen aınalysýy kerektigin birneshe ret kótergeni belgili. Al osy problemany «elektrondyq oqytý» júıesi sheshe alady. Bul júıe engizilgen mektepterde muǵalim oqýshynyń úlgerimi, onyń sabaqqa qatysýy boıynsha barlyq aqparatty elektrondyq nusqamen engizedi. Sosyn júıe arqasynda mınıstr de, bilim departamentiniń ókilderi de mektepterdi mazalamastan-aq, qajetti statıstıkalyq málimetti bazadan alatyn bolady», - dedi R.Eńsebaev. Onyń aıtýynsha, júıe engizilgen mektepterdegi basty másele aqparattardyń qaıtalanýy bolyp otyr.
«Shyndyǵynda, muǵalimder árbir baǵany qaıtalap, ony birese elektrondyq nusqaǵa, birese qaǵaz jýrnalǵa qoıyp júr, óıtkeni olardan osy talap etiledi. Álbette, bul artyq sharýa, ásirese, jobanyń basynan bastap qatysyp júrgenderge qıyndaý. Sondyqtan da eń birinshi kezekte jumystyń jarysa, qosarlana júrgizilýin boldyrmaıtyndaı uıymdastyrý sharalaryn engizip, eń quryǵanda synaq túrinde bolsa da jasap kórý kerek», - dedi R.Eńsebaev.
Óz kezeginde depýtat Gúlnar Yqsanova keıbir óńirlerde ákimdikter ózderiniń elektrondyq júıelerin engizip jatqanyn, sol júıege muǵalimder ózderiniń oqý úlgerimi boıynsha aqparattaryn da engize alatynyn atap ótti.
