Elektrondyq memlekettik satyp alý júıesine kıbershabýyldyń joly kesildi - QR UQK
NUR-SULTAN. QazAqparat – Ulttyq qaýipsizdik komıteti 2020 jylǵy mamyrda «goszakup.gov.kz» memlekettik Internet-resýrsynyń jumysyn ýaqytsha toqtatqan «Elektrondyq memlekettik satyp alý» aqparattyq júıesine (Qazaqstan Respýblıkasynyń aqparattyq-kommýnıkatsııalyq ınfraqurylymynyń asa mańyzdy obektisi bolyp tabylady) úılestirilgen kıbershabýyl (DDos tıpti) faktisi boıynsha qylmystyq isti tergep-tekserýdi aıaqtady. Bul týraly QazAqparat QR Ulttyq qaýipsizdik komıtetiniń resmı saıtyna silteme jasap habarlaıdy.
Kórsetilgen kıbershabýyl saldarynan jalpy somasy 164 mlrd teńgege 7901 memlekettik satyp alý aýystyryldy.
Jedel-izdestirý is-sharalary barysynda, onyń ishinde «EQO» AQ (elektrondyq qarjy ortalyǵy) járdem kórsetýimen elektrondyq memlekettik satyp alýǵa qatysý kezinde keıinnen artyqshylyqtar alý maqsatynda memlekettik Internet-resýrsqa kıbershabýyl jasaǵan QR azamaty anyqtaldy.
Tergep-tekserý jáne júrgizilgen kompıýterlik-tehnıkalyq saraptama nátıjeleri boıynsha adamnyń kinási tolyq dáleldendi, qylmys jasaý quraldary alyndy.
2020 jylǵy 22 jeltoqsanda Nur-Sultan qalasy Saryarqa aýdandyq sotynyń sheshimimen sottalýshy QR QK 207-babynyń 2-bóligi 1-tarmaǵy «Aqparattyq júıeniń nemese telekommýnıkatsııa jelileriniń jumysyn buzý» boıynsha kináli dep tanylyp, 3 jyl merzimge elektrondyq memlekettik satyp alý salasyndaǵy qyzmetpen aınalysý quqyǵynan aıyrýmen 2 jyl merzimge bas bostandyǵyn shekteý túrinde jazalandy.
Úkim zańdy kúshine endi.
