Elektrondyq eńbek bırjasy jańartylǵan formatta jumys isteı bastady

NUR-SULTAN. QazAqparat - 2021 jylǵy 1 naýryzdan bastap Elektrondyq eńbek bırjasy jańartylǵan formatta jumys isteı bastady: jumys berýshini nemese jumyskerdi izdeý krıterııleri keńeıtildi, «Eńbek» memlekettik baǵdarlamasy sheńberinde qonys aýdarý boıynsha aqparat qosyldy, sondaı-aq buryn qoljetimdi servıster jaqsartyldy.

Bul týraly QR Eńbek jáne halyqty áleýmettik qorǵaý mınıstrliginiń baspasóz qyzmeti habarlady.

Jyl basynan beri 15 myńnan astam adam EEB-daǵy qoljetimdi servısterdi paıdalana otyryp, jumys izdep júrgen adam mártebesin aldy, 13 myń adam jumyssyz retinde tirkeldi, 4 myńnan astam adam memleket sýbsıdııalaıtyn jumys oryndaryna jumysqa ornalasty. Sondaı-aq, 1,4 myńnan astam jumyssyz proaktıvti túrde ótinish joldap, Memlekettik áleýmettik saqtandyrý qorynan jumysynan aıyrylý boıynsha áleýmettik tólem aldy.

Kez kelgen EEB paıdalanýshysy kórsetilgen qyzmetterdi naqty ýaqytta portaldyń basty betinde kóre alady.

Sondaı-aq, EEB jańartylǵan nusqasyn iske qosqannan keıin, paıdalanýshyǵa jumysqa ornalasý aımaǵy, bilim deńgeıi, jumys kestesi jáne t. b. boıynsha sıpattamalardyń úlken aýqymy boıynsha bos jumys oryndary men túıindemelerdi tabýǵa múmkindik beretin jańa keńeıtilgen izdeý múmkindigi paıda boldy.

EEB-da kásipterdiń jańartylǵan anyqtamalyǵy men daǵdylar banki engizildi. Endi jumys berýshi qyzmetkerlerdi tek talap etiletin mamandyq boıynsha ǵana emes, sonymen qatar kandıdattardyń qajetti kásibı daǵdylarynyń bolýy boıynsha da tańdaı alady.

Portalda halyqqa memlekettik qyzmetterdi kórsetý boıynsha onlaın-servıs qoljetimdi: EEB arqyly jumyssyz retinde, jumys izdep júrgen adam retinde tirkelýge, jumysynan aıyrylý boıynsha áleýmettik tólemge ótinim jiberýge jáne memleket sýbsıdııalaıtyn bos jumys oryndaryn – jastar praktıkasyn, áleýmettik jumys oryndaryn, qoǵamdyq jumys oryndaryn tańdaýǵa bolady.

Elektrondyq eńbek bırjasynda alǵash ret Nátıjeli jumyspen qamtýdy jáne jappaı kásipkerlikti damytý «Eńbek» memlekettik baǵdarlamasyna qatysýshylardy erikti túrde kóshirý boıynsha aqparat berý servısi jumys isteı bastady.

Paıdalanýshylar qonys aýdarý óńirlerimen, memlekettik qoldaý sharalarymen, tańdalǵan eldi mekenderde turý jaǵdaılarymen jáne onda bar ózekti bos jumys oryndarymen tanysa alady.

Jyl boıy EEB-da jańa servıster men qosymsha múmkindikterdi engizý josparlanýda.