Elektrondyq densaýlyq saqtaý ortalyǵy Tsıfrlyq damý mınıstrligine ótpek

ASTANA. QazAqparat – «Respýblıkalyq elektrondyq densaýlyq saqtaý ortalyǵy» memlekettik kásiporny Tsıfrlyq damý, ınnovatsııalar jáne aeroǵarysh ónerkásibi mınıstrliginiń quzyretine berilýi múmkin. Atalǵan mekemeni ózge vedomstvoǵa berý sheshimi ashyq talqyǵa shyǵarylǵan Úkimet qaýlysynda jazylǵan, dep habarlaıdy QazAqparat tilshisi.

Aıta keteıik, bul ýaqytqa deıin kásiporyn Densaýlyq saqtaý mınıstrliginiń qaramaǵynda bolǵan.

«Densaýlyq saqtaý mınıstrliginiń «Respýblıkalyq elektrondyq densaýlyq saqtaý ortalyǵy» respýblıkalyq memlekettik kásiporny Tsıfrlyq damý, ınnovatsııalar jáne aeroǵarysh ónerkásibi mınıstrliginiń sharýashylyq is júrgizý quzyretine berilsin.

Tsıfrlyq damý, ınnovatsııalar jáne aeroǵarysh ónerkásibi mınıstrligi kásiporynǵa qatysty memlekettik basqarýdyń tıisti salasyna basshylyq etý jónindegi ýákiletti organ bolyp belgilensin», - dep kórsetilgen qujatta.

Qaýlyny ashyq talqylaý 9 qarashaǵa deıin jalǵasady.

Qosa ketsek, buǵan deıin Syrtqy ister mınıstrliginiń quzyretinde bolǵan «Otandastar qory» Eńbek jáne halyqty áleýmettik qorǵaý mınıstrligine berilgen bolatyn.