Elektrondyq aqshany shyǵarý men paıdalanýǵa quqyqtyq negiz jasaıtyn zań jobasy maquldandy
ANA. 30 naýryz. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda palata depýtattary «QR keıbir zańnamalyq aktilerine elektrondyq aqsha máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldady.
Esterińizge sala keteıik, atalǵan zań jobasy elimizde elektrondy aqshany shyǵarý ári paıdalaný úshin quqyqtyq negiz qalyptastyrý bolyp tabylady. Sondaı-aq, elektrondyq aqsha shyǵarý jáne onymen tólemderdi, ózge de qarjy operatsııalaryn júzege asyrý úshin olardy paıdalaný salasynda qalyptasyp otyrǵan quqyqtyq qatynastardy retteý kózdeledi. Mamandardyń aıtýynsha, bundaı elektrondyq aqsha jańadan engiziletin dúnıe emes, óıtkeni osyndaı elektrondyq aqsha Qazaqstanda aınalymda bar. Degenmen, bundaı aqsha elimizde rezıdent emester tarapynan shyǵarylady jáne bulardyń bári sheteldik valıýta túrinde bolyp otyr. Sondyqtan da zań jobasy júzege assa, qazaqstandyq bankter ulttyq valıýta, ıaǵnı teńge boıynsha elektrondyq aqsha shyǵara bastaıdy. Óz kezeginde ınternet paıdalanýshylar jelilerdi paıdalana otyryp, on-laındyq satyp alýlar jasaı alady. Toqtala ketetin jaıt, elektrondyq aqshany ıelený árbir ınternet paıdalanýshy jeke tulǵalardyń tańdaýy arqyly júzege asady. Sonymen birge, búgingi kúni elimizdegi elektrondyq kommertsııa salasynda otandyq elektrondyq aqshanyń bolmaýy saldarynan qarajattyń syrtqa aǵylý jaǵdaıy da kezdesken. Otandyq bankterdiń elektrondyq aqsha shyǵara bastaýy odan keıingi kezeńderde elimizde qajetti ınfraqurylymdardy qurýǵa negiz bolady. Sondyqtan da, zań jobasyn qabyldaý nátıjesinde elimizde ınternet-saýda jandana túsedi dep kútilýde.
Ekinshi oqylymǵa ázirleý barysynda depýtattar tarapynan 44 túzetý engizilgen bolatyn. Palata bunyń 40-yn qabyldady. Májilispen eki oqylym boıynsha maquldaǵan zań jobasy Parlament Senatyna jiberiledi.
