Elektrondy vaktsına pasportyn eGov mobile qosymshasyna shyǵaryldy

NUR-SULTAN. QazAqparat – Qazaqstannyń memlekettik bas sanıtar dárigeri Erlan Qııasov elektrondy vaktsına pasportyn eGov mobile alýdyń joldaryn túsindirdi, dep habarlaıdy QazAqparat tilshisi.

Baspasóz-konferentsııada jýrnalısterdiń suraǵyna jaýap bere otyryp, Erlan Qııasov vaktsınalaý pasportynyń qandaı bolatynyn sıpattap berdi.

«Vaktsınalaýdyń tolyq tsıklinen ótken adamdar úshin, ıaǵnı eki doza alǵandarǵa eGov mobile bazasynda elektrondy pasport beriledi. Eger eGov mobile qosymshasyn qoldanýshy bolsańyz, uıaly telefon arqyly ózińizdiń jeke paraqshańyzǵa kirip, jeke derekter baǵanyndaǵy tsıfrlyq qujattardyń ishinen taba alasyz. Sol jerde vaktsınalaý pasporty shyǵyp turady. Vaktsınanyń qashan jáne qandaı mekemede salynǵany, jaýapty dárigerdiń kim ekeni, derekterdi kim engizgeni týraly aqparattyń bári qamtylǵan»- dedi Erlan Qııasov.

Onyń sózine qaraǵanda, elektrondy qujatqa qazir qazaq jáne orys tilderinde ǵana aqparat engizilgen. Aldaǵy ýaqytta aǵylshyn tilindegi trnaskrıptsııasy da engizilmek.

«Buǵan qosy qosymshaǵa kirgen kezde vaktsınalaý pasportynyń QR kodyn engizý múmkindigi jasalǵan», - dedi bas sanıtar.