«Elektrondy úkimettiń» damýyn memlekettik qyzmetkerler tejep otyr

ASTANA. 21 qyrkúıek. QazAqparat - «Astana qalasynyń elektrondy ákimdigi» jobasynyń úılestirýshisi Dáýren Topaev Qazaqstanda «elektrondy úkimetti» damytýǵa kedergi bolyp otyrǵan negizgi máselelerdi atady.

Onyń aıtýynsha, naqty úsh problema bar. «Birinshiden, Astanada ǵana emes, jalpy Qazaqstan boıynsha memlekettik qyzmetterdi elektrondy túrde paıdalaný kórsetkishi tómen. Sebebi halyq oǵan áli tolyqtaı daıyn emes. Máselen, búgingi statıstıkany alyp qarasaq, Astana turǵyndarynyń 68,8 paıyzynda Internet bar. Biraq olardyń basym bóligi ǵalamtordy tek hat jiberý, oıyn oınaý, mýzyka, foto men fılmderdi júkteý úshin ǵana qoldanatyndaryn rastady. Demek, biz Internettiń barlyq múmkindikterin paıdalanyp jatqan joqpyz. Ekinshiden, Internettiń baǵasy tym qymbat. Búginde jetekshi operatordyń ortasha baǵasy - aıyna 4 myń teńge. Halyqtyń 30 paıyzy ondaı tólemaqyny kótere almaı otyr. Úshinshiden, memlekettik qyzmetkerlerdiń kóbisi elektrondy júıeniń engizilýimen qyzmet ornymnan aıyrylyp qalamyn dep seskenedi. Sondyqtan «e-ákimdikti» damytý jumysynda qulyqsyzdyq tanytyp jatady. Olaı oılamaý kerek. Biz bir nárseni túsinip alýymyz qajet. Elektrondy júıeniń engizilýimen bizde qosymsha ýaqyt paıda bolady. Biz ony basqa sharýalarǵa tıimdi paıdalana alamyz», - deıdi D.Topaev.