«Elektrondy úkimet» júıesi áli de bolsa nasıhatty qajet etedi - Asqar Jumaǵalıev
ASTANA. 10 jeltoqsan. QazAqparat /Aıdar Ospanalıev/ - Elimizde jyl basynda «zlektrondy úkimet» júıesi arqyly 18 myń qyzmet kórsetilgen bolsa, búginde atalmysh júıe arqyly kórsetilgen qyzmetter sany 1 mıllıon 300 myńǵa jetti.
Bul málimetterdi búgin «Nur Otan» partııasynyń Partııalyq baqylaý komıtetiniń janyndaǵy Memlekettik qyzmet pen ruqsat qaǵazdaryn baqylaý men monıtorıng júrgizý jónindegi respýblıkalyq qoǵamdyq keńestiń otyrysynda Baılanys jáne aqparat mınıstri Asqar Jumaǵalıev keltirdi.
Onyń sózine qaraǵanda, buryndary «elektrondy úkimetti» kúnine shamamen 2,5 myń adam paıdalanyp kelgen bolsa, búginde ony qoldanýshylar sany keminde 4 esege ósti. Ortasha statıstıkalyq málimetter boıynsha, elektrondy úkimetti paıdalanýshylar sany 10 myńǵa deıin ósken. Bul tsıfrdiń kúnine 16 myńǵa deıin jetken kezderi bolǵan.
«Al elektrondy jolmen lıtsenzııa berý máselesine kelsek, osy ýaqytqa deıin berilgen ruqsat qaǵazdarynyń sany 600-den asyp jyǵylady. Olaı bolsa, bul baǵyttaǵy jumystardy áli de jetildire túsken jón. Ol úshin «elektrondy úkimet» júıesin áli de bolsa keńinen nasıhattaý kerek. Óıtkeni ony paıdalanýshylar sanynyń artýy júıeniń qanshalyqty sapalylyǵyna nemese tıimdiligine ǵana baılanysty emes. Bul rette elektrondy qyzmetti paıdalanýǵa turǵyndar qanshalyqty deńgeıde daıyn jáne olar bul júıege qanshalyqty senedi degen másele de úlken rol atqarady», - dedi mınıstr.
