Elektrondy úkimet portalynda jańa qyzmet túri paıda boldy
Endi azamattar zańdy tulǵany tirkeý kezeńinde-aq banktik esepshotty elektrondy ashýǵa ótinim berip, qyzmetkerlerdi saqtandyrý kelisimshartyn bekite alady. Olar zańdy tulǵalardy memlekettik tirkeý, banktik shot ashý jáne jumyskerdi óz eńbek mindetterin oryndaý kezinde jazataıym oqıǵalardan mindetti saqtandyrýdy eskere otyryp, fılıaldary men ókildikterin eseptik tirkeý dep atalatyn jıyntyq qyzmetti paıdalanady.
«Osy ýaqytqa deıin turǵyndar zańdy tulǵany memlekettik tirkeýge turǵyzǵan soń, banktik shot ashý úshin memlekettik tirkeý týraly anyqtamany bankke aparatyn. Sodan keıin jumyskerlerdi mindetti saqtandyrý úshin saqtandyrý kompanııasyna barýy qajet edi. Al endi birikken jańa kompozıttik qyzmet arqasynda eki jumys kúni ishinde zańdy tulǵanyń memlekettik tirkeýge alynǵany týraly kýálikti, banktegi shottyń nómirin, qyzmetkerlerdi jazataıym oqıǵalardan saqtaý týraly qol qoıylǵan kelisimshartty alý múmkindigi týdy», - dep túsindirdi «Ulttyq aqparattyq tehnologııalar» AQ basqarma tóraıymy Botagóz Qasabek Úkimet úıinde ótken baspasóz máslıhatynda.
Basqarma tóraǵasynyń aıtýynsha, jańa kompozıttik qyzmetke ekinshi deńgeıli bankter men saqtandyrý kompanııalaryn qosý boıynsha birqatar jumys atqarylǵan.
«Búgingi tańda atalǵan kompozıttik qyzmetke eki bank - «ForteBank» AQ jáne «Tsesnabank» AQ jáne «Memlekettik annýıtettik kompanııa» saqtandyrý kompanııasy» AQ qosyldy. 18 qańtarǵa deıin elektrondy úkimet arqyly «Fortebank» AQ-da eki derbes shot tirkeldi. Aldaǵy ýaqytta jańa kompozıttik qyzmetke qosylatyn bankter men saqtandyrý kompanııalarynyń sany ósedi, sondaı-aq, azamattardyń jaılylyǵy men elimizdegi bıznes-klımattyń jaqsarýy úshin birneshe jańa qyzmet túri ashyldy», - dep tolyqtyrdy óz sózin B. Qasabek.
Jańa qyzmet Dúnıejúzilik banktiń «Doing Business» atty reıtınginde Qazaqstannyń kásiporyndardy tirkeý, elektrmen jabdyqtaý, menshikti tirkeý, kelisimsharttardyń oryndalýyn qamtamasyz etý krıterııleri boıynsha kórsetkishterin jaqsartýǵa septigin tıgizbek.
Eske sala ketsek, halyqaralyq Doing Business reıtıngi jyl saıyn jarııalanady jáne ol 190 memleketti qamtıdy. 2017 jyldyń qorytyndysy boıynsha, Qazaqstan «Doing Business» reıtınginde 36-orynǵa turaqtady.
