Elektrondy úkimet: Qazaqstan memqyzmettiń qoljetimdiligi reıtınginde 29-shy orynda

NUR-SULTAN. QazAqparat – BUU reıtınginde 2020 jyly Qazaqstanda elektrondy úkimet deńgeıi 10 pozıtsııaǵa jaqsarǵan. Bul týraly QR Memlekettik qyzmet isteri jónindegi agenttiktiń memlekettik qyzmet departamentiniń dırektory Eldar Úısimbaev málim etti, dep habarlaıdy QazAqparat tilshisi.

«Memlekettik qyzmet isteri jónindegi agenttiginiń basty jumystarynyń biri – memlekettik qyzmettiń sapasyn arttyrý. Búgingi tańda tsıfrlandyrý el ómiriniń ajyramas bóligine aınaldy. Tsıfrlandyrý sonymen qatar memlekettik qyzmetti kórsetý salasyna da oń áserin tıgizdi. Qazirge deıin elde kórsetiletin memlekettik qyzmetterdiń 90 paıyzdan astamy elektrondy formatqa aýystyrylǵan. Osynyń arqasynda memlekettik qyzmetti kórsetý protsedýrasyndaǵy zańsyzdyq úsh ese azaıdy. Jumysymyzdyń jemisin mynadan kóremiz: BUU reıtınginde 2020 jyly Qazaqstanda elektrondy úkimet deńgeıi 10 pozıtsııaǵa jaqsarǵan. Qazirgi ýaqytta Qazaqstan 193 memleket bar reıtıngte 29-shy orynda tur», - dedi Eldar Úısimbaev elordada ótken baspasóz máslıhatynda.

Onyń aıtýynsha, kópshilik paıdalanbaı jatqan memlekettik qyzmetterdiń túrleri de bar.

«Áıtse de elektrondy úkimet portalynda qoljetimsiz memlekettik qyzmettiń 54 túri bar bolyp shyqty. «Jumys istemeı» turǵan memlekettik qyzmettiń kóbi Syrtqy ister mınıstrligine, Eńbek jáne halyqty áleýmettik qorǵaý, Densaýlyq saqtaý, Bilim jáne ǵylym, Іshki ister, Mádenıet jáne sport, Aýyl sharýashylyǵy jáne Qarjy mınıstrligine tıesili», - dedi ol.