Elektrondy tólem júıesine qatysty aptasyna 100-ge tarta shaǵym túsedi - Astana LRT
ASTANA. QazAqparat - «Astana LRT» JShS Basqarma tóraǵasynyń orynbasary Beıbit Esjanov elordadaǵy qoǵamdyq kólik qozǵalysyna qatysty zańbuzýshylyqtar týraly aıtyp berdi, dep habarlaıdy QazAqparat tilshisi.
«Elektrondy tólem júıesi boıynsha bizge aptasyna shamamen júzge tarta shaǵym túsip jatady. Áleýmettik jeli paraqshalaryndaǵy sońǵy vıdeorolıkterdi taldaı otyryp, keńesshilerdiń (kondýktorlar) nemese júrgizýshilerdiń bıletti bermeı qoıatynyn baıqadyq. Mundaı jaǵdaıǵa orta eseppen qolma-qol aqsha tóleıtin jolaýshylardyń 7 paıyzy tap bolady eken. Osyǵan baılanysty bir aptanyń ishinde 13 shaǵym kelip túsken. Bul baǵytta biz kóliktik baqylaý ınspektsııasyn tartý arqyly ákimshilik jaýapkershilikke tartyp jatyrmyz», - dedi Beıbit Esjanov qala ákimdiginde ótken baspasóz máslıhatynda.
Onyń aıtýynsha, osy jyldyń 1 qańtarynan bastap 2422 zań buzýshyǵa (kompanııada eńbek etetin) 27,282 mln teńgeniń aıyppuly salynǵan. Olardyń 2,1 myńy keńesshi bolsa, 322-i júrgizýshi.
«Bul rette aıta keterligi, jolaýshylar tarapynan da zań buzyp jatatyn kezder kezdesedi. Jyl basynan beri 5658 jolaýshyǵa osy baǵytta 27,214 mln teńgeniń aıyppuly salynǵan. Mine, sondyqtan jolaýshylarǵa qazirgi zańnamadaǵy talaptardy saqtaýy kerektigin aıtqymyz keledi», - deıdi ol.
