Elektrondy shot-faktýra engizý qazaqstandyq bıznestiń jyl saıynǵy 5 mlrd. teńgesin únemdeýge septigin tıgizedi

Bul týraly búgin Qarjy mınıstrliginde elektrondyq shot-faktýra engizý máselesine arnalǵan dóńgelek ústel barysynda Salyq komıteti tóraǵasynyń orynbasary Arǵyn Qypshaqov málim etti.

«Shot-faktýralardy qaǵazben tapsyrý qosymsha shyǵystarǵa táýeldi etip otyratyny ras. Máselen, buǵan operatorlardyń eńbek shyǵyndaryn da, jumsalatyn qaǵazdardy da, poshta markalaryn da, jetkizilim shyǵyndaryn da jatqyzýǵa bolady. Bul jumystardyń barysynda shot-faktýrany berýdiń bekitilgen rásimi bar, ol boıynsha satýshy onyń eki danasyn toltyryp, birin satyp alýshyǵa jetkizip berýi tıis. Al Qazaqstanda qarapaıym jurtshylyqqa berilip jatatyndy qospaǵanda, jyl saıyn shamamen 56 mln. shot-faktýralar jazylady eken. Bul degenińiz shamamen jylyna 120 myń býma qaǵaz shyǵyndalatynyn bildiredi», - deıdi A. Qypshaqov.

Onyń sózine qaraǵanda, shot-faktýralardy satyp alýshynyń nemese satýshynyń muraǵattarynda saqtaý qajettigi jaǵynan da týyndaıtyn problemalar barshylyq. Sondyqtan da, salyqtyq tekserister barysynda muraǵattarda shot-faktýralardy izdestirýge birshama ýaqyt pen eńbek shyǵyndalady.

Sonymen qatar, A. Qypshaqov shot-faktýraǵa ketetin eń tómengi shyǵyn shamamen 100 teńge bolatynyn atap ótip, osy rette elektrondyq tásildiń 10 esege arzanǵa túsetinin alǵa tartty. «Osynyń ózi elektrondyq shot-faktýralar engizýdiń bıznes úshin asa qolaıly bolatyndyǵyn bildirse kerek», - deıdi A. Qypshaqov.