Elektrondy saýda óńirlerde gaz tapshylyǵyn týyndatpaı ma
ASTANA. QazAqparat - Parlament Májilisine búgin usynylǵan zań jobasy negizinde suıyltylǵan gazdy tek elektrondy saýda alańdary arqyly ótkizý kózdelgen. Al elektrondy saýda damymaǵan óńirlerde gaz tapshylyǵy týyndamaı ma? Zań jobasyn talqylaý kezinde májilismen Arman Qojahmetov osyndaı másele kóterdi, dep habarlaıdy QazAqparat tilshisi.
«Siz usynyp otyrǵan zań jobasy suıytylǵan munaı-gaz ben jabdyqtaýdyń jańa mehanızmin engizedi. Endi elektrondyq saýda alańdary arqyly ishki naryqty gazben qamtý josparlanyp otyr. Aıtyńyzshy, bul mehanızm jekelegen óńirlerde elektrondy saýda alańdary bolmaýyna baılanysty suıytylǵan gaz tapshylyǵyna alyp kelmeı me?», - dep suraq qoıdy májilismen Arman Qojahmetov zań jobasy jaıly baıandama jasaǵan depýtat Baqtyqoja Іzmuhambetovke.
Óz kezeginde Baqtyqoja Іzmuhambetov eń birinshiden, gaz óndirýshi mekemeler men zaýyttardyń ishki naryqqa gaz berý mindeti saqtalatynyn eske saldy.
«Ekinshiden, usynyp otyrǵan zań jobasynda gazdy taratýdyń ádisi ǵana ózgergeli otyr. Baıandamada aıtylǵanyndaı, elektrondy saýda alańdary birtindep, áýeli kelesi jyldyń 1 qańtarynan bastap 10-20 paıyzǵa, sodan keıin eki jyldyń ishinde - 2019-2021 jyldary elektrondy saýda alańdary barlyq aımaqtarǵa engiziletin bolady. Sondyqtan, eki jyldyń ishinde barlyq aımaqtar elektrondyq saýda alańdarymen tolyqtaı qamtylady. Sondyqtan, qaralyp otyrǵan zań jobasy gazdyń tapshylyǵyna ákelip soqtyrmaıdy», - dedi Baqtyqoja Іzmuhambetov.
Aıta ketsek, Parlament Májilisiniń otyrysynda palata depýtattary «Gaz jáne gazben jabdyqtaý týraly» QR Zańyna ózgerister men tolyqtyrýlar engizý týraly» zań jobasyn birinshi oqylymda maquldaǵan bolatyn.
Foto: economics.unian.net
