Elektrondy saýda alańdarynyń kómegimen qazaqstandyq taýarlar eksportqa shyǵarylmaq
«Elektrondy saýda arqyly taýarlardy ótkizýdi damytý josparymyz bar. 2019-2025 jyldarǵa arnalǵan Qazaqstan Respýblıkasynda elektrondy kommertsııany damytý jol kartasy bekitildi. Ol negizgi úsh baǵytty qamtıdy: elektrondy saýdadaǵy eksportty ulǵaıtý; otandyq kásipkerlerdi elektrondy saýdaǵa tartý jáne ınfraqurylymdy damytý; tutynýshylardyń quqyqtaryn qorǵaýdy kúsheıtý jáne elektrondy saýdany ilgeriletý. Búginde elektrondy saýda alańdarynyń kómegimen qazaqstandyq taýarlardy eksportqa shyǵarý máselesi qarastyrylyp jatyr», - dedi vıtse-mınıstr vedomstvonyń Memleket basshysynyń taıaýdaǵy Joldaýynyń negizgi baǵyttaryn túsindirýge arnalǵan alqa otyrysynda.
Onyń atap ótýinshe, 28 tamyzda QR Saýda jáne ıntegratsııa mınıstrligi reseılik Wildberries kompanııasymen yntymaqtastyq týraly kelisimge qol qoıdy. Atalǵan kelisim qazaqstandyq eksporttaýshylarǵa elektrondy saýda arnalaryn paıdalaný arqyly Reseı, EAEO, Shyǵys Eýropa naryqtaryna shyǵýyna jol ashady. Atalǵan kompanııamen Nur-Sultan jáne Almaty qalalarynda qoıma keshenderin qurý týraly aldyn ala ýaǵdalastyqqa qol jetkizilip otyr. Bul Reseı men Qazaqstan arasyndaǵy logıstıkalyq baılanysty keńeıtýge múmkindik beredi.
