Elektrondy memlekettik satyp alý júıesin jasaýǵa jumsalǵan qarjy bir jyl ishinde 10 esege artyǵymen óteldi
ASTANA. Jeltoqsannyń 24-i. QazAqparat /Aıdar Ospanalıev/ - Búgin Astanada Qarjy mınıstrliginde Úkimet basshysy Kárim Másimovtiń tóraǵalyǵymen elektrondy memlekettik satyp alý máselelerine baılanysty májilis ótti,
dep habarlaıdy QazAqparat.
Otyrys barysynda qarjy mınıstri Bolat Jámishev pen mınıstrlik ókilderi Premer-Mınıstrdi «Elektrondy konkýrs» modýli men elektrondy memlekettik satyp alýǵa qatysty arnaıy vep-portaldyń jumysymen tanystyrdy. B.Jámishevtiń sózine qaraǵanda, mınıstrlik «Elektrondy úkimet» jobasy aıasynda, elektrondy memlekettik satyp alý máselesine baılanysty júıeli sharalar atqarǵan. «Qazirgi tańda zań talaptary boıynsha memlekettik satyp alýlardy 5 túrli ádis boıynsha júzege asyrýǵa bolady. Solardyń biri elektrondy saýda. Bul baǵytta 2008 jyly baǵa berý arqyly usynys túsirý ádisi negizinde júzege asyrylatyn «Elektrondy memlekettik satyp alýlar» modýli daıyndalǵan. 2009 jyly atalmysh júıe tájirıbe júzinde iske asyrý úshin paıdalanylýǵa berilip, oǵan qatysty memlekettik organdardyń basshylarymen tıisti memorandýmdarǵa qol qoıyldy», dedi mınıstr.
Onyń atalmysh júıe negizinde atqarylǵan isterdiń nátıjelerine súıene otyryp keltirgen málimetterine qaraǵanda, aǵymdaǵy jyldyń jeltoqsan aıyndaǵy kórsetkishter boıynsha atalmysh júıede 18 myńnan astam tapsyrys berýshiler men 12 myńnan astam taýar jetkizýshiler tirkelgen. Sondaı-aq elektrondy júıe arqyly 220 myńnan astam satyp alý sharalary júzege asyrylyp, osy tásildiń negizinde únemdelgen soma 24 paıyzdy nemese 6 mıllıardqa jýyq teńgeni quraǵan. Al osy júıeni jasaqtaýǵa jumsalǵan qarjy bir jyldyń ishinde 10 esege artyq ótelgen.
Otyrysta sóz alǵan Premer-Mınıstr mınıstrlik ókilderiniń «Elektrondy úkimet» jobasy aıasynda aldyǵa qoıǵan mindetterdi satylap júzege asyryp kele jatqandyǵyn atap kórsetti. «Bul shara sybaılas jemqorlyq áreketteriniń barynsha aldyn alýǵa múmkindik berip, bıýdjet shyǵyndaryn qysqartady. Sondaı-aq ol satyp alý úderisine qatysýshylardyń barlyǵynyń áreketteriniń ashyq bolýyn qamtamasyz etedi. Menińshe, bul óte mańyzdy qadam. Sondyqtan ony aldaǵy ýaqytta da barynsha jetildire berý qajet», dedi K.Másimov.
