Elektrondy medıtsınalyq tólqujat ne úshin qajet
QR Densaýlyq saqtaý mınıstri Eljan Birtanovtyń aıtýynsha, aǵymdaǵy apta basynda elimizde elektrondy medtsınalyq tólqujat jobasy iske qosylǵan.
«Osy aptada azamattar densaýlyǵynyń elektrondy tólqujatyn iske qostyq. Ázirge bul ilki joba. Siz mGov portaly arqyly ózińiz týraly barlyq medıtsınalyq aqparatty taba alasyz. Qandaı medıtsınalyq mekemede qaralǵanyńyz, dárigerlerdiń sizge qandaı dárini tegin jazǵany týraly jazbalardyń bári sonda bolady. Kelesi jyly bul tólqujat onlaın rejimde jumys isteıdi. Osynyń arqasynda halyqty emdeýge ketetin shyǵynnyń ashyq bolýyn qamtamasyz etemiz. Taǵy bir paıdasy, siz Qazaqstannyń kez kelgen núktesinde dárigerge qaralsańyz da, sizdiń aýrý tarıhyńyzdy dáriger elektrondy bazadan taba alady. Osy sııaqty kóptegen qaǵazbastylyq joıylady», - dedi vedomstvo basshysy.
Kelesi jyly atalmysh tólqujattyń mobıldik nusqasy da shyǵýy múmkin.
«Biz kóp jyldan beri dári-dármekti esepke alý, aýrýhanada qaǵazsyz is júrgizý úshin túrli aqparattyq júıelerdi damytyp kelemiz. Bul derekterdiń barlyǵy jeke aqparattyq júıelerde, jeke serverlerde jınaqtaldy. Bizdiń mindetimiz - árbir azamat osy jazbalardy ózi kórip, baqylap, olarǵa qol jetkize alatyndaı etip jasaý. Tsıfrlandyrý eń áýeli medıtsınanyń transparenttiligin, memleket shyǵynynyń ashyqtyǵyn qamtamasyz etý úshin qajet. Óıtkeni elektrondyq pasport aýrýhanalar men emhanalarda júrgiziletin qujattardan quralady. Bıyl meniń buıryǵym boıynsha medıtsına salasy túgeldeı resmı túrde qaǵazsyz formatqa kóshedi. Іs júzinde tegin medıtsınalyq qyzmet kórsetetin barlyq aýrýhanalar, emhanalar búgin elektrondyq nysanda jazba júrgizýge mindetti. Osy jumystyń arqasynda biz aýrýhanalardyń jumysyn ońtaılandyryp qana qoımaı, qaǵazbastylyqtan qutylyp, shyǵyndardy qysqartýǵa qol jetkizemiz», - dedi Eljan Birtanov.
