«Elektrondy qazaq úıine» tańdamaly aıtys jyrlary enedi
ALMATY. QazAqparat - Qazaq rýhanı-mádenı murasy jınaqtalǵan «Elektrondy qazaq úıine» 2015 jyly tańdamaly aıtys jyrlary enbek. Bul týraly búgin Almatyda ótken «Ulttyq qundylyqtar - álem nazarynda» atty konferentsııa barysynda jobanyń jaýapty redaktory Jarqyn Sálenuly málimdedi.
Atalǵan mýzykalyq-ınteraktıvti qural 2014 jyldyń sáýir aıynda tutynýshyǵa jol tartqan bolatyn.
Besik jyrlary, ertegiler, balalar ánderi, halyq kompozıtorlarynyń án-kúıleri, terme-tolǵaýlar, otanshyldyq rýhtaǵy ánder, Abaıdyń qara sózderin qamtyǵan 1200 rýhanı týyndyny ón boıyna syıǵyzǵan baǵaly mura 2015 jyly birshama jetildirilip, jańa mazmunmen tolyqpaq.
«Bul joba osy jetistigimen toqtap qalmaıdy. Bıyl alǵashqy ónimi shyqty. Árıne, kemshilikter bolsa túzelip, usynystar bolsa eskere jatamyz. Qudaı qalasa kelesi jyly tańdaýly aıtys jyrlarymen tolyqtyramyz. Jobaǵa enbeı qalǵan talaı jaýharlarymyz bar. Keler jyly Qurmanǵazy atyndaǵy konservatorııanyń oqytýshylarymen kelise otyryp quraldyń mazmunyn odan ári jetildire túsemiz», - dedi Jarqyn Sálenuly.
Joba avtorlary «Elektrondy qazaq úıdi» álemdik deńgeıge shyǵarý úshin sheteldik qazaqtarǵa tanystyryp qaıtqan.
«Mońǵolııa, Reseı, Túrkııada tanystyrylymyn jasadym. Túrkııalyq azamattar tarapynan aldaǵy ýaqytta buǵan búkil túrki jurtynyń mýzykalyq murasyn engizsek degen usynys aıtty. Sheteldegi qandastarymyz búkil Qazaqstan kóship kelgendeı boldy dep qýanyp jatyr. Sondaı-aq, bul qural JOO men orta oqý oryndarynda mýzykalyq-pedagogıkalyq kómekshi qural retinde paıdalanyla bastady. Úshinshiden, bul bizdiń urpaqqa qajet dúnıe. Baýyrjan atamyz aıtqandaı, bul ertegi aıtpaıtyn ájelerdiń, besik jyryn aıtpaıtyn kelinderdiń ornyn basatyn dúnıe», - dedi J.Sálenuly.
Aıta keteıik, «Ulas-Elektrondy» JShS ónimi - joba jetekshileriniń 3 jyldyq qajyrly eńbeginiń jemisi.
Shaǵyn ǵana kıiz úıdiń materıaldary búldirshinderge qaýipsiz etip jasalynǵan. Kıiz úıdiń tetikterin bassańyz, qazaqtyń kúıi kúmbirlep, áni shyrqala bastaıdy. Tipti balalarǵa arnalǵan ertegiler, ańyz-áńgimeler, Abaıdyń qara sózderine deıin bar. Qazaq halqynyń aýyz ádebıeti injý-marjan murasynyń qundy jaýharlaryn da osy elektrondy qazaq úıden tabasyz. Ónimniń quny - 10 myń teńge.
Atalǵan joba úshin avtorlar QR Bilim jáne Ǵylym mınıstrliginiń alǵys hatyna laıyq dep tanyldy.
Endi elektrondy qazaq úıin mektep pen balabaqsha baǵdarlamasyna qazaq tili men tarıhyn oqytý quraly retinde engizý kózdelip otyr. 2015 jyly atalǵan másele QR BǴM saraptaý keńesinde talqylanatyn boldy.
