Elektrondy eńbek sharty 16 mln qaǵaz qujattan bas tartýǵa múmkindik beredi
ASTANA. QazAqparat - Elektrondy eńbek sharty 16 mln qaǵaz qujattan bas tartýǵa múmkindik beredi. Bul týraly Ortalyq kommýnıkatsııalar qyzmetindegi baspasóz máslıhatynda QR Eńbek jáne halyqty áleýmettik qorǵaý vıtse-mınıstri Narıman Muqyshev aıtty, dep habarlaıdy QazAqparat tilshisi.
«Qazirgi ýaqytta Qazaqstan Respýblıkasynyń Eńbek jáne halyqty áleýmettik qorǵaý mınıstrliginiń bazasynda elektrondyq eńbek sharttaryn esepke alý boıynsha biryńǵaı saqtaý orny quryldy. Jumys berýshi áleýetti jumyskermen shart jasasady jáne sol shart týraly aqparatty veb-servıs arqyly biryńǵaı saqtaý ornyna jiberedi. Elektrondy eńbek shartynda qaǵazdaǵydaı barlyq málimetter, atap aıtqanda taraptardy rekvızıtteri, eńbek sharttar, demalys rejimi, jalaqy mólsheri, jumysshy men jumys berýshiniń quqyqtary men mindetteri kórsetiledi. Oǵan elektrondy tsıfrlyq qoltańba arqyly qol qoıylady», - dedi vıtse-mınıstr.
Buǵan qosa, onyń sózine qaraǵanda, elektrondy eńbek shartyna engiziletin ózgerister, sondaı-aq olardyń qoldanysy toqtatylǵan kezdegi málimetter mindetti túrde tirkeledi.
«Eńbek shartyn elektrondy formatqa aýystyrý kadrlyq esepke alýdy avtomattandyrýǵa, qaǵaz eńbek kitapshasy men ózge de qaǵaz qujattardy alyp tastaýǵa múmkindik beredi. Nátıjesinde bas tartýǵa bolatyn qaǵaz qujattardyń sany 16 mıllıon bolady», - dedi ol.
Narıman Muqyshevtiń aıtýynsha, mınıstrlik elektrondyq eńbek sharttarynyń quqyqtyq mártebesin jáne jumys berýshiniń eńbek qatynastary týraly málimetterdi usynýdaǵy mindettemelerin retteý maqsatynda zańnamaǵa túzetýler ázirlegen.
