Elektrondy eńbek bırjasy jumyspen qamtýdyń tıimdi quralyna aınalyp keledi – Dúısenova

ASTANA. QazAqparat – – Elektrondy eńbek bırjasy halyqty jumyspen qamtý máselesin sheshýdiń tıimdi quralyna aınalyp keledi. Bul týraly Úkimet otyrysynda QR Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy QazAqparat tilshisi.

«Búgingi tańda Ulttyq jobalardyń bári tsıfrlandyrylǵan. Elektrondy eńbek bırjasynda jumys oryndary men zeınetaqy aýdarymdaryna monıtorıng júrgizilýimen qatar Eńbek kodeksiniń normalaryna sáıkes, eńbek sharttaryn tirkeý máselesi de qamtylyp otyr. Buǵan deıin 112,6 myń elektrondy kelisimshartqa monıtorıng júrgizildi. Onyń tórtten birine jýyǵy 12 aıǵa deıingi merzimge jasalǵany anyqtaldy», - dedi ol.

Osy rette mınıstr Úkimet basshysy Álıhan Smaıylovtan óńir ákimderinen turaqty jumys oryndaryn qurý jáne eńbek kelisimsharttaryn Elektrondy eńbek bırjasynda tirkeý týraly mindettemelerdiń oryndalýyn talap etýdi, jobalardyń ákimshisi bolyp sanalatyn ortalyq memlekettik organdarǵa jáne oblystardyń ákimderine osy jumystyń atqarylýyn qamtamasyz etýdi tapsyrýdy surady.

«Elektrondy eńbek bırjasynyń taǵy bir artyqshylyǵy – eńbek resýrstarynyń el ishindegi qozǵalysyna monıtorıng júrgizýge múmkindik bar. Sońǵy 3 aıdyń ózinde óńirler arasyndaǵy eńbek resýrstarynyń aǵyny ulttyq jobalarda kórsetilgen 28,3 myń bos jumys ornynyń 4 myńnan astamyn qurap otyr. Elimizdiń ózge aımaqtarynan eńbek kúshin tartý boıynsha kósh basynda Almaty qalasy men Qaraǵandy oblysy tur. Óńirler arasyndaǵy aýys-qıystyń 58 paıyzy osy baǵyttardyń enshisinde. Jalpy, Elektrondy eńbek bırjasyna shyǵarylǵan bos jumys oryndarynyń 87 paıyzyn adamdar ıelenip úlgerdi. Bir sózben aıtqanda, Elektrondy eńbek bırjasy halyqty jumyspen qamtý máselesin sheshýdiń tıimdi quralyna aınalyp keledi. Sondyqtan, ony jergilikti atqarýshy organdar belsendi túrde qoldanýǵa tıis», - dedi Tamara Dúısenova.