Elektrondy eńbek bırjasy: Qandaı mamandyqqa suranys joǵary
«Biz enbek.kz portalyna qansha ótinim túskenin, qansha adam jumysqa ornalasyp, qansha jumys berýshi tirkelgendigin únemi qadaǵalap otyramyz. Búgingi kúni portalda shamamen 70 myń jumys berýshi tirkelgen. Shamamen 42 myń bos jumys orny, 92 myń túıindeme bar. Aǵymdaǵy jyldyń basynan beri 360 myń jumys berýshi júginip, olardyń ishinde 347 myń adam turaqty jumysqa ornalasty», - dedi ol.
Osy rette ortalyqtyń vıtse-prezıdenti elimizde qandaı mamandyqqa suranystyń joǵary ekendigin atap ótti.
«Búgingi kúni medıtsına, mektepke deıingi bilim berý, aqparattyq tehnologııalar, ІT-menedjment, ınternet qaýipsizdigi syndy salalardyń mamandaryna suranys joǵary bolyp otyr. Portaldaǵy suranys joǵary mamandyqtarǵa únemi saraptama jasap otyramyz. Aıta keterligi, jumys izdeýshiler tarapynan ekonomıster, zańgerler kóp bolǵanymen jumys berýshiler tarapynan mundaı qyzmetterge suranys joq. Jalpy aıyna 150 myń, tipti 300 myń teńge de tóleýge daıyn jumys berýshiler bar», - dedi Erbol Ospanov.
Sonymen qatar ol eńbek salasyn tsıfrlandyrý aıasynda birneshe jobamen jumys istep jatqandyqtaryn aıtty.
«Onyń birinshisi - elektrondy eńbek kitapshasy. Qazirgi ýaqytta biz ilki rejimde birlesken jumys júrgizip jatyrmyz. Munan bólek qaǵazbastylyqtan arylý jáne barlyǵyn elektrondy formatqa kóshirý úshin eńbek sharttaryn tirkeý qyzmetin ashtyq. Muny nıet tanytqan kez kelgen jumys berýshi enbek.kz portalynda júzege asyra alady. Bul qyzmet 1 qarashadan bastap jumys istep tur», - dedi E.Ospanov.