Elektrondy eńbek bırjasy: 130 myń adam jumys tapty

NUR-SULTAN. QazAqparat - Tsıfrlandyrý áleýmettik-eńbek salasyn jańǵyrtýdyń basty faktorlarynyń biri bolyp sanalady. Bul týraly Astana Hub aýmaǵynda tsıfrlyq transformatsııany talqylaý barysynda QR Eńbek jáne halyqty áleýmettik qorǵaý mınıstri Berdibek Saparbaev málim etti, dep habarlaıdy QazAqparat mınıstrliktiń baspasóz qyzmetine silteme jasap.

«Tsıfrlyq tehnologııalar áleýmettik kómek kórsetýdiń mańyzdy quraly. Árbir taǵaıyndalǵan járdemaqy, jumyspen qamtylǵan adam jáne árbir memlekettik qyzmet mınıstrliktiń aqparattyq júıeleriniń úılesimdi jumysy arqyly iske asyrylady. Óıtkeni tsıfrlandyrýdyń negizgi maqsaty - ákimshilik rásimderdi jeńildetý, azamattar alatyn memlekettik qyzmetterdiń barynsha ashyqtyǵyn jáne qoljetimdiligin qamtamasyz etý», - dedi vedomstvo basshysy.

Sonymen qatar, ol Eńbek mınıstrliginiń qyzmetteri tsıfrlandyrý áserimen belsendi ózgeretinin atap ótti. Mańyzdy baǵyttardyń biri - ol Big Data, onyń negizinde qazirdiń ózinde tıimdi sheshim qabyldaý úshin taldaý sharalary qalyptastyrylýda.

Budan bólek, aǵymdaǵy jyldyń ekinshi jartysynan bastap múgedektikti syrttaı belgileý boıynsha qyzmetti odan ári keńeıtý josparlanyp otyr. Osy merzimde «Áleýmettik qyzmetter» portalyn iske qosý eskerilgen. Ol jeke qajettilikterdi eskere otyryp, tehnıkalyq ońaltý quraldaryn derbes tańdaýdy qamtamasyz etýge, olardy usyný merzimderin qysqartýǵa múmkindik beredi.

Aıta keteıik, 2018 jyldyń 1 qańtarynan respýblıkada alǵashqy tsıfrlyq platforma jáne eldegi eń iri bos jumys oryndary men túıindemeler banki - Elektrondy eńbek bırjasy jumys isteı bastady. Jumys bastalǵannan beri Bırjada 985 myń bos jumys orny men732 myń túıindeme ornalastyryldy. Eńbek bırjasy arqyly 2019 jyldyń basynan beri 135 myńnan astam azamat jumysqa ornalasty. Aǵymdaǵy jyly osy júıeni odan ári damytý josparlanyp otyr: qurylǵan jumys oryndarynyń kartasyn engizý, onlaın-oqytý, vırtýaldy konsýltantty engizý jáne basqalary.

«Elektrondy sharttardy engizý, «E-halyq» elektrondy bazasyn damytý boıynsha jumys jalǵastyrylatyn bolady, oǵan qazirgi ýaqytta aýyldyq okrýgterdiń 100 paıyzy qosylǵan. «Qoljetimdi orta» portalynda múgedekter úshin nysandardyń qoljetimdiligi boıynsha derekterdi ózektendirý boıynsha jumys jalǵasady. Jalpy, 2018 jyly elektrondyq jáne proaktıvti memlekettik qyzmetterdiń arqasynda shamamen 939 mln teńge únemdelgen», - delingen Eńbek jáne áleýmettik qorǵaý mınıstrligi málimetinde.