Elektrondy COVID pasporty jaıly málimetter qanshalyqty ras
NUR-SULTAN. QazAqparat - Internette elektrondyq COVID pasporty máselesi qyzý talqylanyp jatyr, dep habarlaıdy QazAqparat stopfake.kz resýrsyna silteme jasap.
Keı paıdalanýshylardyń paıymdaýynsha, bul qujatty ázirleýdi Rokfeller qory qarjylandyrady, sondaı-aq elektrondy densaýlyq pasporty ıdeıasy jeke derekterdiń qaýipsizdigin jáne qozǵalys erkindigin buzady.
Mysaly, bloger Ekaterına Kovalenko óziniń YouTube-taǵy vıdeosynda osy jáne basqa da máseleler boıynsha alańdaýshylyq bildirdi. StopFake.kz portaly mundaı pasporttyń ne úshin qajet bolýy múmkin ekenin jáne áleýmettik jelilerde ol týraly qandaı ańyzdar taraǵanyn anyqtady.
Elektrondy COVID pasporty birneshe elde jasalyp jatyr. Bul – paıdalanýshynyń medıtsınalyq málimetteri, sonyń ishinde COVID-19 test nátıjeleri jáne vaktsınatsııalaý týraly málimetter engizilgen mobıldi qosymsha ataýy.
Feık: jobany Rokfeller qory qarjylandyrady
Shyndyq: Elektrondy COVID pasportyn birden birneshe uıym ázirleýde. Brıtanııalyq jeke menshik TentoHealth IT kompanııasy COVI-PASS jobasyn usyndy.
Commons Project Foundation kommertsııalyq emes qoǵamdyq qory – CommonPass ázirlemesiniń avtory.
VST Enterprises kompanııasy V-healthPassport qosymshasyn jasaýda.
IBM korporatsııasy da óz jobasyn usyndy – Digital Health Pass.
Feık: COVID pasport ınternet-bankıng parolderi men tólem kartalarynyń derekteri sekildi derbes málimetterdi jınaıdy.
Shyndyq: ázirleýshi kompanııalardyń resmı saıttarynda qosymshalarda tek medıtsınalyq málimetter ǵana bolady, olar óz erkimen, óz kelisimimen júkteledi delingen.
Sonymen qatar, qosymshalar Eýroparlament pen keńestiń jeke derekterdi óńdeýge qatysty jeke tulǵalardy qorǵaý jáne osyndaı derekterdiń erkin qozǵalysy týraly erejelerine baǵynady.
Feık: COVID-pasporttardy jasaý mindetti bolady.
Shyndyq: Búgingi kúni mundaı aqparat joq jáne bolmaıdy, óıtkeni barlyq elektrondyq densaýlyq pasporttary ázirlený ústinde nemese testileý satysynda. Mysaly, Commons Project Foundation kommertsııalyq emes qoǵamdyq qory usynǵan CommonPass nusqasy Cathay Pacific Airways jáne United Airlines áýe kompanııalarynda synaqtan ótkizilýde.
Sondaı-aq, VST Enterprises kompanııasynyń óz jobasyn álemniń 15 eline, sonyń ishinde AQSh, Portýgalııa, Frantsııa, Panama, Úndistan, Kanada, Shvetsııa, Ispanııa, Meksıka, Ońtústik Afrıka, BAÁ jáne Nıderlandqa jetkizýge kelisimsharttar jasaǵandyǵy belgili.
Tentohealth resmı saıtynda qosymshasy bıyl kúzde kópshilik úshin qoljetimdi bolady dep jazylǵan.
Feık: COVID-pasporttarynsyz jumysqa qabyldamaıdy
Shyndyq: mundaı málimdemege negiz joq. Ázirleýshi kompanııalardyń saıttarynda qosymshalardy ujymdaǵy epıdemıologııalyq jaǵdaıdy baqylaý úshin paıdalanýǵa bolady delingen. Bul talapty mindetti túrde oryndaý kerek ekendigi týraly eshteńe jazylmaǵan .
Feık: COVID-pasporttarynyń kómegimen adamdardy baqylaýǵa bolady.
Shyndyq: qosymshalar medıtsınalyq málimetterdi jınaý jáne saqtaý úshin ǵana jasalǵan, olardy qajet bolǵan jaǵdaıda, mysaly, áýejaıda nemese jappaı is-sharalarda kórsetýge bolady. Resmı ázirleýshilerdiń saıttarynyń eshqaısysynda qosymshalarǵa GPS fýnktsııasy engiziletini týraly derekter joq.
