Elektrondy aıyppul salýǵa arnalǵan planshetter kólik ınspektorlaryna da beriledi
NUR-SULTAN. QazAqparat – Jol-patrýldik polıtsııa qyzmetkerlerimen birge ákimshilik quqyqbuzýshylyq boıynsha hattamalardy elektrondy formatta toltyratyn planshetter kólik komıtetiniń qyzmetkerlerine de berilýde.
Bul týraly OKQ-da ótken baspasóz máslıhatynda Bas quqyqtyq statıstıka jáne arnaıy esepke alý jónindegi komıteti tóraǵasynyń orynbasary Baǵlan Bekbaev málim etti, dep habarlaıdy QazAqparat tilshisi.
«Bárimiz de jol erejelerin saqtaý máselelerimen, aıyppul arqalaý jaǵdaılarymen betpe-bet kelip jatamyz. Sol sebepti, biz dál osy jumysty Іshki ister mınıstrligimen birlesip, jol-patrýldik polıtsııa qyzmeti jelisi boıynsha bastadyq. Qazirgi tańda joba tolyǵymen júzege asyrylyp, Іshki ister mınıstrliginiń barlyq qurylymdyq bólimshelerine engizildi. Qazirgi tańda jol-patrýldik qyzmetiniń 7 myń qyzmetkeri mamandandyrylǵan planshetti ustap, jumys atqarýda. Olar hattamalardy elektrondy formada toltyryp jatyr», - dedi Baǵlan Bekbaev.
Quzyrly organ ókiliniń aıtýynsha, kezeń-kezeń boıynsha basqa da memlekettik organ qyzmetkerleriniń qolyna planshet berilmek.
«Biz jaqynda kólik ınspektsııasyn da osy jobaǵa qostyq. Kólik komıtetiniń 200 ınspektory búgingi tańda ákimshilik quqyqbuzýshylyqtardy elektrondy formada toltyrýda. Bıyl 1,5 mln ákimshilik quqyqbuzýshylyq elektrondy formatta toltyryldy», - dedi Baǵlan Bekbaev.
