Elektrondy astyq qolhaty ınstıtýtyn engizý qarastyrylyp jatyr - AShM

ASTANA. 9 sáýir. QazAqparat - Elimizdegi astyq salasyndaǵy baqylaýdy kúsheıtý úshin elektrondy astyq qolhaty ınstıtýtyn engizý kózdeledi. Bul týraly búgin Aýyl sharýashylyǵy mınıstrliginde ótken brıfıng barysynda Agroónerkásip keshenindegi memlekettik ınspektsııa komıteti tóraǵasynyń orynbasary Almabek Mars málim etti.

Tóraǵa orynbasarynyń aıtýynsha, astyqty qabyldaý qoımalaryndaǵy jıi oryn alyp otyrǵan jolsyzdyqtardy joıý maqsatynda qoldanystaǵy zańǵa birqatar ózgerister engizý kútiledi. Atap aıtqanda, elektrondy astyq qolhaty ınstıtýtyn zań júzinde bekitip, ony aınalymǵa engizý kózdeledi. «Munyń mańyzy zor. Óıtkeni, osy júıe arqyly qambada qansha astyq saqtalyp otyrǵanyn qadaǵalaı alamyz. Budan bólek, mindetti saqtandyrý týraly zańǵa astyq qolhatyn ustaýshylardyń aldynda azamattyq-quqyqtyq jaýapkershilikti arttyrýǵa baǵyttalǵan normalar qaralatyn bolady. Bul zań jobalary qazir talqylanyp jatyr», - deıdi A. Mars.

Budan basqa, komıtet ókili jergilikti jerlerde astyq qabyldaý kásiporyndarynan kólik jáne temirjol joldarymen astyqtyń tıelýin baqylaıtyn tıisti shtabtar qurý týraly Úkimetke usynys joldanǵanyn da atap ótti. Ondaı shtabtyń quramyna enetin quqyq qorǵaý qyzmetkerleri men oblys ákimdikteriniń qyzmetkerleri kásiporyndardan shyǵarylatyn astyqtyń zańdylyǵyn da baqylaıtyn bolady.