Elektrondyq saýda: Jańa zańda marketpleıske de jaýapkershilik júkteletin bolady

ASTANA.KAZINFORM – Aldaǵy ýaqytta elektrondyq saýda salasynda jaýapkershilik onlaın satýshylarǵa ǵana emes, marketpleıs ákimshiligine de júkteletin bolady. Bul týraly QR SIM Tutynýshylardyń quqyqtaryn qorǵaý komıteti tóraǵasynyń orynbasary Serik Qusaıynov aıtty.

– Jańa zańda elektrondyq saýda salasynda tutynýshylar quqyǵyn qorǵaý boıynsha normalar kúsheıtiledi. Negizi, elektrondyq saýda salasynda da, kádimgi saýda-sattyq salasynda da tutynýshy quqyǵyn qorǵaý prıntsıpteri birdeı. Tek taýardy onlaın satyp alý kezinde biz satýshyny tirideı kórmeımiz jáne sonyń kesirinen keıbir jaǵdaılardy tolyq qadaǵalaý múmkin emes. Sondyqtan endigide bul salada satyp alýshynyń quqyǵy buzylatyn bolsa, sol onlaın saýda alańynyń ákimshiligi taýar satýshyǵa shara qolanady. Sol úshin elektrondyq saýda alańy «saýda obektisine» teńestiriledi. Ol degenimiz, máselen, Kaspi.kz dúkeninen adam taýar satyp alyp, onyń sapasyna kóńili tolmasa jáne ony qaıtarýǵa taýar satýshy kelispese, onda sol Kaspi.kz onlaın platformasynyń ákimshiligi ózine tirkelgen taýar satýshymen tikeleı jumys isteıdi degen sóz, - dedi ol.

Spıker adamdar marketpleıs pen sonda tirkelgen satýshyny jıi shatystyratynyn aıtty.

– Marketpleıs - Kaspi.kz, Ozon.kz, Wildberries sekildi onlaın saýda platformalary. Olar tek satý alańyn usynady, al taýardy sonda tirkelgen satýshy júzege asyrady, - dep naqtylady Serik Qusaıynov.

Eske sala ketsek, elimizde 2023 jyldyń qyrkúıeginen beri Tutynýshylardyń quqyǵyn qorǵaý týraly jańa zań jobasy qaralyp jatyr. Qazir ol Májilistiń qaraýynda.

Buǵan deıin tutynýshylar jańa zań qabyldanǵan soń 4 satyly shaǵymdaný kezeńderinen ótpesten, birden sotqa júgine alý múmkindigi engiziletini jaıly jazǵan edik. 

Sondaı-aq elimizde tutynýshylar quqyǵyn qorǵaý ombýdsmeni ınstıtýty qurylady.