Elektrondyq saýda operatory uǵymy engiziledi
ASTANA.KAZINFORM – Parlament Májilisiniń jalpy otyrysynda «Qazaqstan Respýblıkasyndaǵy kedendik retteý týraly» Kodeksine ózgerister men tolyqtyrýlar engizý týraly» zań jobasy birinshi oqylymda maquldandy.
Qujat elektrondy saýdany retteýge jáne sheteldik ınternet-platformalarda satyp alynǵan taýarlardy tasymaldaý tártibin jetildirýge baǵyttalǵan.
QR Ulttyq ekonomıka vıtse-mınıstri Azamat Ámrın atalǵan zań jobasy jóninde baıandama jasap, naqty ózgeristerdi málimdedi.
– Birinshi, halyqaralyq poshta arqyly shet eldik ınternet-platformalardan úshinshi elderden jeke tulǵalardyń atyna jiberiletin taýarlardy bólek sanatqa – elektrondyq saýda taýarlaryna bólý; Ekinshi, «elektrondyq saýda operatory» uǵymyn engizý; Úshinshi, elektrondyq saýda deklaratsııasy degen jańa túrdegi keden deklaratsııasyn engizý qarastyrylǵan, – dedi ol.
Vıtse-mınıstrdiń sózinshe, qazirgi tańda shet eldik ınternet-platformalardan satyp alynatyn taýarlar jeke paıdalanýǵa arnalǵan taýarlar sanatyna jatady. Sonymen birge, erkin kirgizý normasynan asqan jaǵdaıda deklaratsııalanady.
Taýarlardyń elektrondyq saýdaǵa jatatyn túrleri jeke tulǵalardyń jeke paıdalanýy úshin ǵana arnalǵan jáne kásipkerlik qyzmetti júzege asyrýǵa arnalmaǵan.
Sonymen qatar, atalǵan taýarlar resmı statıstıkaǵa engizilmeıdi, sebebi saýda aınalymyna jatpaıdy.
Elektrondyq saýda taýarlarynyń barlyq kólemin deklaratsııalaý shet eldik ınternet-platformalardan satyp alynatyn taýarlar týraly tolyq statıstıkany qurýǵa múmkindik beredi.
Sóziniń túıininde Azamat Ámrın zań jobasynyń maqsattaryna toqtaldy.
– Osylaısha, zań jobasy elektrondyq saýda operatorynyń taýarlardy deklaratsııalaý bóliginde halyq úshin kedendik rásimderdi ońaılatýǵa; elektrondyq saýda taýarlary ımportynyń tolyq ári shynaıy statıstıkasy men qurylymyn qalyptastyrýdy qamtamasyz etýge; transshekaralyq elektrondyq saýda salasyn retke keltirýge jáne naryqtyń ashyqtyǵyn arttyrýǵa baǵyttalǵan, – dedi ol.
Aıta keteıik, buǵan deıin depýtat Ádil Jubanov atalǵan zań jobasy boıynsha egjeı-tegjeıli túsinik bergenin jazǵanbyz.
