Elektrondyq saýda alańynda zańsyz saýda jasaǵandarǵa jaýapkershilik engizilmek
ASTANA. KAZINFORM – Elektrondyq saýda alańynda zańsyz saýda jasaǵandarǵa ákimshilik jaýapkershilik engizilmek. Bul týraly Májilis depýtattarynyń saýalyna Premer-Mınıstrdiń orynbasary – Ulttyq ekonomıka mınıstri Serik Jumanǵarınniń jaýabynda aıtylǵan.
— Qazirgi ýaqytta Saýda jáne ıntegratsııa mınıstrligi elektrondyq saýda salasyndaǵy zańnamany jetildirý boıynsha jumys istep jatyr. Osylaısha, Májilis depýtattary «Tutynýshylardyń quqyqtaryn qorǵaý týraly» zańǵa elektrondyq saýda sýbektileriniń uǵymdyq apparatyn naqtylaý bóliginde (elektrondyq saýda alańy (marketpleıs), ınternet-dúken, aqparattyq-jarnamalyq platforma), sondaı-aq elektrondyq saýda alańdary úshin birqatar mindettemeni engizý jóninde túzetýlerge bastama jasady, — dedi Serik Jumanǵarın jaýabynda.
Onyń atap ótýinshe, saýda alańdary úshin mynadaı mindettemeler engizilmek:
— satýshylardyń elektrondyq saýda alańyna ruqsat alýy úshin ishki erejelerdiń (tirkeý, aýtentıfıkatsııalaý jáne basqa da rásimder) bolýyn mindetteý;
— elektrondyq saýda alańy men satýshy arasyndaǵy shartta satýshylardyń tutynýshylardyń quqyqtaryn qorǵaý týraly zańnama talaptaryn saqtaýyna qatysty sharttardyń (taýarǵa (jumysqa, qyzmetke) jáne satýshyǵa (óndirýshige, oryndaýshyǵa) qatysty aqparat usyný jáne t. b.) kózdelýi;
— tutynýshylardyń quqyqtaryn buzǵany úshin satýshylarǵa qatysty elektrondyq saýda alańy tarapynan sanktsııalar;
— tutynýshynyń taýarǵa sáıkestik sertıfıkattaryna qol jetkizýi jáne ózge de sharalar.
— Tutynýshylar men quqyq ıeleriniń zańdy múddelerin saqtaý maqsatynda Májilis depýtattary zań jobasy aıasynda elektrondyq saýda sýbektileri tarapynan satýshy men taýar týraly aqparattyń bolmaýy, sondaı-aq zańsyz saýda faktileri boıynsha ákimshilik jaýapkershilik engizý máselesin pysyqtaýda, — dedi vıtse-premer.
Aıta keteıik, Astana halyqaralyq forýmynda Memleket basshysy Qasym-Jomart Toqaev elimiz SryptoCity dep atalatyn jańa pılottyq jobany júzege asyrýdy josparlap otyrǵanyn aıtqan edi.