Elektrondyq kezek arqyly shekaradan 1 mln astam júk kóligi ótken
ASTANA. KAZINFORM – Qazaqstan–Reseı shekarasyndaǵy ótkizý pýnktterinde «CarGoRuqsat» elektrondyq kezek júıesi arqyly 1 mıllıonnan astam júk kóligi ótken. Bul týraly QR Qarjy mınıstrligi Memlekettik kirister komıtetiniń ókili Baıdos Baıbozın tikeleı efırde málimdedi.
Onyń aıtýynsha, bul júıe shekaradan ótý úderisin jeńildetip, kólik qozǵalysyn retteýge múmkindik beredi. Sonyń nátıjesinde tasymaldaýshylarǵa túsetin ákimshilik júkteme azaıyp, kútý ýaqyty qysqarady.
– Elektrondyq kezek júıesi kezeń-kezeńimen engizildi. Búginde ol elimizdiń barlyq shekara baǵyttarynda, sonyń ishinde Reseımen shekarada jumys istep tur. Osy arqyly júrgizýshiler shekaradan ótetin ýaqytyn aldyn ala josparlaı alady, – dedi Baıdos Baıbozın.
Spıkerdiń málimetinshe, júıe iske qosylǵaly beri EAEO elderimen shekaradaǵy 36 ótkizý pýnktinde elektrondyq kezekti 1 mıllıonnan astam júk kóligi paıdalanǵan. Bıyldyń ózinde 200 myńnan astam kólik tirkelgen.
Sondaı-aq júıe 18 memlekettik aqparattyq júıemen biriktirilgen. Sonyń arqasynda tasymaldaýshylar ótkizý pýnktine barmaı-aq aıyppuldar men ruqsat qujattary týraly aqparatty aldyn ala teksere alady.
Eske sala keteıik, buǵan deıin birqatar óńirde kóktemgi kezeńde joldardy saqtaý úshin aýyr júk kólikteriniń qozǵalysyna ýaqytsha shekteý engiziletinin habarlaǵan edik.
