Elektrondy úkimet júıesinde eleýli ózgeris bolady - mınıstr
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıev eGov portalynda bolǵan aqaýǵa qatysty túsinik berdi.

- Mundaı aqaýlar jıi bolmaıdy dep aıtqym keledi. Ekinshiden, keshe júıe ınfraqurylymyna erekshe júkteme baıqaldy. Osyndaı júkteme buǵan deıin bolmaǵan edi. Qysqa merzimde, ıaǵnı bir saǵattan az ýaqytta 1 mln-nan astam ótinim kelip túsken. Jalpy, bizde elektrondy úkimettiń arhıtektýrasyn, onyń eGov qosymshasyn ózgertý, sondaı-aq elektrondy úkimettiń shlıýzin jaqsartý josparlanǵan. Bul óz kezeginde júıege júkteme artqan kezde, osynyń barlyǵyna tótep berýge múmkindik beredi, - dedi J.Mádıev Parlament Májilisinde tilshiler suraǵyna jaýap bere otyryp.
Onyń aıtýynsha, keshe eGov portalyndaǵy aqaýlardy túzetý úshin kúni boıy tıisti is-sharalardy atqarǵan. Qazir onyń negizgi qyzmeti qalpyna keltirilgen.
Eske salsaq, 1 sáýir kúni eGov portalynda birinshi synypqa qujat qabyldaý bastaldy. Alaıda qazaqstandyqtar tehnıkalyq aqaýlarǵa tap boldy.