Elektrondy shylym salyǵynan bıýdjetke qansha kiris túsedi

Qarjy mınıstrligi Memlekettik kirister komıteti Baqylaý departamentiniń dırektory Eldos Saýdabaev elektrondy shylym kirgizýshiler bıýdjetke qansha salyq tólegenin aıtty, dep habarlaıdy Kazinform agenttigi.

Departament dırektorynyń sózinshe, 2023 jyldyń 8 aıynda elektrondy shylymǵa qoldanylatyn 14 655 lıtr suıyqtyq ákelingen.

«Bul salada tólengen salyq pen kedendik bajdyń jalpy somasy 1 mlrd 914 mln teńge bolsa, onyń 778 mln teńgesi aktsız, 100 mln teńgesi kedendik baj, 1 mlrd 36 mln teńgesi qosylǵan qun salyǵy», - dedi Eldos Saýdabaev.

Aıta ketý kerek, Qazaqstanda elektrondy shylym ımportyna túbegeıli tyıym salý máselesi qyzý talqylanyp keledi. Tipti Májilis depýtaty Nurgúl Taý Premer-Mınıstrdiń atyna depýtattyq saýal da joldaǵan bolatyn. Elektrondy shylymnyń ımportyna qarsy top kámeletke tolmaǵan qazaqstandyqtar arasynda veıptiń keń taralǵanyna alańdaýly.