Elektrondy saýda taýarlary mindetti túrde deklaratsııalanady
ASTANA. KAZINFORM — Búgin Senattyń jalpy otyrysynda 2017 jylǵy 11 sáýirdegi Eýrazııalyq ekonomıkalyq odaqtyń Keden kodeksi týraly shartqa ózgerister engizý týraly hattamany ratıfıkatsııalaý týraly» Zańy maquldandy.
Atalǵan Hattamaǵa 2023 jylǵy 25 jeltoqsanda Sankt-Peterbýrg qalasynda Eýrazııalyq ekonomıkalyq odaqtyń múshe memleketter basshylary qol qoıdy.
— Onyń maqsaty — sońǵy jyldary turaqty ósim kórsetip otyrǵan syrtqy elektrondyq saýdany quqyqtyq retteý. Máselen, 2024 jyly Qazaqstan Respýblıkasyndaǵy elektrondyq saýda kólemi 3,2 trln teńge.
Sonymen qatar, Hattamany Eýrazııalyq ekonomıkalyq odaqtyń barlyq memleketteri — Reseı, Belarýs, Qyrǵyzstan jáne Armenııa ratıfıkatsııalady. Hattamada qamtylǵan negizgi ózgeristerge toqtalsaq, elektrondy saýda taýarlary, ıaǵnı sheteldik ınternet-platformalardan jeke tulǵalardyń atyna halyqaralyq poshtalyq jóneltilimder arqyly jiberiletin taýarlardy bólek sanatqa shyǵarý eskerilgen, — dedi senator Bekbol Orynbasarov.
Qujat aıasynda elektrondyq saýda taýarlaryn jetkizýdi júzege asyratyn poshta operatory — «elektrondy saýda operatory» uǵymyn engizý qarastyrylǵan.
Munymen qosa, kedendik deklaratsııanyń jańa túrin — elektrondyq saýda deklaratsııasyn engize otyryp, elektrondy saýda taýarlarynyń barlyq kólemin kedendik deklaratsııalaý kózdelgen.
— Qazirgi kezde qoldanystaǵy zańnamaǵa sáıkes, sheteldik ınternet-dúkenderden jeke tulǵalarǵa keletin taýarlar jeke paıdalaný taýarlary retinde sanalady. Bajsyz ákelý normasynan (200 eýro nemese 31 kg) asqan jaǵdaıda ǵana deklaratsııalanady. Bul kezde jeke tulǵalar óz betinshe qujat tapsyryp, taýar qunynyń 15%-y mólsherinde jıyntyq kedendik tólem tóleıdi, ıaǵnı norma sheginde ákelingen taýarlar deklaratsııalanbaıdy jáne resmı statıstıkaǵa engizilmeıdi. Hattama boıynsha elektrondy saýda taýarlarynyń tolyq kólemi mindetti túrde deklaratsııalanatyn bolady. Bul naqty statıstıka jasaýǵa múmkindik beredi. Deklaratsııany operator da, taýar alýshynyń ózi de tańdaýyna qaraı tapsyra alady, — dedi depýtat.
2021 jyldan bastap Eýrazııalyq ekonomıkalyq odaq elderinde elektrondyq saýda taýarlaryn resimdeý boıynsha pılottyq joba júrgizilip jatyr. Qazaqstanda operatorlar retinde «Qazposhta» AQ jáne «DHL International Kazakhstan» JShS qatysyp otyr. Bolashaqta logıstıka men keden organdarymen jumys tájirıbesi bar basqa kompanııalar da operator bola alady.
— Atalǵan Hattamany qabyldaý elektrondyq saýda salasyndaǵy kedendik rásimderdi retke keltiredi, naqty ári tolyq statıstıka qalyptastyrýǵa múmkindik beredi, naryq qatysýshylary úshin teń jaǵdaı jasaıdy, sondaı-aq kedendik tólemderdi ákimshilendirý tıimdiligin arttyrady, — dedi Bekbol Orynbasarov.
Budan buryn habarlanǵandaı, EAEO júk tasymalyn baqylaý úshin navıgatsııalyq plombalar qoldanýdy bastaıdy.