Elektrondy saýda: taýarlardyń tolyq ári naqty statıstıkasy jasalady
ASTANA. KAZINFORM – Búgin Senattyń jalpy otyrysynda «Qazaqstan Respýblıkasyndaǵy kedendik retteý týraly» Kodeksine ózgerister men tolyqtyrýlar engizý týraly» Zańy eki oqylymda qaralyp, maquldandy.
Atalǵan zań 2017 jylǵy 11 sáýirdegi Eýrazııalyq ekonomıkalyq odaqtyń Keden kodeksi týraly shartqa jeke tulǵalarǵa satýǵa arnalǵan elektrondy saýda taýarlaryn retteýge qatysty ózgerister engizý jónindegi Hattamalarǵa sáıkes keltirý maqsatynda ázirlengen.
- Osy qujat aıasynda Eýrazııalyq ekonomıkalyq odaqtyń kedendik shekarasy arqyly elektrondyq saýda taýarlaryn ótkizý tártibi men sharttarynyń ózindik erekshelikteri naqty belgilenedi. Sonymen qatar zańnamalyq deńgeıde «elektrondyq saýda operatory» degen jańa uǵym engizilip otyr. Bul rette jańa zańnamalyq túzetýler elektrondy saýda operatorlarynyń arnaıy tizilimine engizý sharttary men tártibin aıqyndap, olardyń negizgi mindetteri men quqyqtyq jaýapkershiligin shegelep beredi, - dedi senator Bekbol Orynbasarov.
Sonymen birge kedendik rásimdeý úderisin zamanaýı talaptarǵa saı beıimdeý maqsatynda kedendik deklaratsııanyń múldem jańa túri, ıaǵnı elektrondy saýda deklaratsııasy qoldanysqa engiziledi. Bul rette, jeke adamdarǵa satýǵa arnalǵan elektrondy saýda taýarlaryna qatysty keden qoımasynyń kedendik rásimin qoldanýdyń da ózindik erekshelikteri tolyqtaı retteledi.
- Bul otyrǵan zań sheteldik ınternet-alańdarda satyp alynatyn taýarlardyń tolyq ári naqty statıstıkasyn qalyptastyrýǵa jáne kedendik ákimshilendirý sapasyn aıtarlyqtaı jaqsartýǵa septigin tıgizedi. Budan basqa, elektrondy saýda operatorynyń taýarlardy deklaratsııalaý bóliginde halyq úshin kedendik rásimderdi barynsha jeńildetýine múmkindik týady. Bul qadamdar elektrondy saýda taýarlary ımportynyń tolyq, anyq statıstıkasy men qurylymyn qalyptastyrýdy qamtamasyz etip, jalpy otandyq naryqtyń ashyqtyǵy men aıqyndyǵyn arttyrýǵa tikeleı yqpal etedi, - dedi depýtat.
Aıta keteıik, buǵan deıin elektrondyq saýda operatory uǵymy engiziletinin jazǵan edik.
