Elektromobıldi jeńildikpen ákelý toqtatyldy: qazaqstandyqtar úshin jańa tártip engizildi

ASTANA. KAZINFORM – Qazaqstanda elektromobılderdi jeńildikpen ákelýge arnalǵan kvota tolyq paıdalanyldy. Endi mundaı kólikterdi ákelý jalpy negizde, barlyq kedendik tólemder men salyqtardy tóleı otyryp júzege asyrylady, dep habarlaıdy Memlekettik kirister komıteti.

Vedomstvo málimetinshe, Eýrazııalyq ekonomıkalyq komıssııanyń 2009 jylǵy 27 qarashadaǵy sheshimine sáıkes, EAEO aýmaǵyna ákelinetin elektromobılder kedendik ákelý bajynan bosatylady. Alaıda bul jeńildik jyl saıyn ár elge belgilenetin kvota sheńberinde ǵana qoldanylady.

2025 jylǵa Qazaqstan úshin belgilengen kvota 15 myń birlikti quraǵan.

«2025 jylǵy 14 qazanǵa qaraı jeńildikti ákelýge arnalǵan barlyq kvota tolyq paıdalanyldy. Osylaısha, belgilengen lımıt aıaqtaldy jáne kedendik bajdan bosatý sharasy endi qoldanylmaıdy. Budan bylaı elektromobılder barlyq kedendik tólemder men salyqtardy tóleı otyryp, jalpy tártipte rásimdeledi», – delingen aqparatta.

Elektromobılderdi ákeletin jeke tulǵalar úshin kedendik rásimdeýdiń úsh nusqasy bar:

1. Taýarlarǵa arnalǵan deklaratsııa (TD):

– kedendik alym – 6 AEK;
– qosylǵan qun salyǵy (QQS) – 12.%.

Bul tómendetilgen mólsherlemeler tek DSU aldyndaǵy mindettemeler aıasynda jáne EAEO Keńesiniń 2015 jylǵy 14 qazandaǵy sheshimimen bekitilgen tizimge engizilgen kólikterge ǵana qoldanylady. Mundaı elektromobılderdi tek Qazaqstan aýmaǵynda paıdalanýǵa bolady, ózge elderge qaıta shyǵarý ruqsat etilmeıdi.

2. EAEO Biryńǵaı kedendik tarıfi (BKT):

– kedendik alym – 6 AEK;
– ákelý kedendik bajy – kólik qunynyń 15%;
– QQS – 12%.

3. Jolaýshylar kedendik deklaratsııasy (JKD):

– rásimdeý kezinde kólik qunynyń 27% mólsherinde jıyntyq kedendik tólem alynady.

Sarapshylardyń aıtýynsha, kvotanyń aıaqtalýy elektromobıl naryǵynda baǵa ósimine ákelýi múmkin. Degenmen, jeńildikterdiń toqtatylýy ishki óndiriske jáne otandyq elektrkólik jobalaryn damytýǵa yntalandyrý beredi.

Aıta keteıik, elde elektromobılder 18 myńǵa jýyqtady.